Read Runyoro - rutooro Nfu 18 Bible Online

Nfu 18 - Runyoro - rutooro bible

Nfu 18

¹Omuntu anyakwecwaho abandi, aba naserra amagezi ag'okwanga kuhaburwa kwona.

²Omudoma, tayenda kwetegereza, eky'ayenda kiri kimu kyonka, nukwo kwoleka ekiteekerezo kye.

³Obu haija obubi, buli haija n'emigayo kandi nambere haba ekihemu, nuho haba kuswazibwa,

⁴Ebigambo omuntu eby'agamba, bisisana amaizi ag'enziha, ensoro y'amagezi, nuko akambu akarukujurumuka.

⁵Tikiri kirungi kugogereza omubi, n'okuhenderra ataina musango.

⁶Ebigambo omudoma eby'abaza, bizaara empaka, kandi akanwa ke, kamurugiramu kuteerwa.

⁷Akanwa k'omudoma, nuko kamuhwerekereza, ebigambo bye, nugwo omutego ogunyakumukwata.

⁸Ebigambo by'empwehweterezi bisisana ebyokulya ebirukunura omuntu bimutaahira kimu omunda.

⁹Omuntu omugara, omu mirimo, aba mwenewaabu ogu anyakusiisasiisa ebintu.

¹⁰Ibara lya MUKAMA, munaara ogugumire; omuhikiriire nugwo ataahamu, akatunga obusinge.

¹¹Obuguuda bw'omuntu omuguuda, nurwo orubuga rwe orw'amaani, kandi busisana ekisiika ekiraihire ekinyakumulinda.

¹²Omuculeezi nuwe ayetungira ekitiinisa; abeekuniki bali mu muhanda gw'okuhwerekerra.

¹³Agarukamu atahuliriize, aba ndoma kandi muhwansoni.

¹⁴Okwehayo kulikugumya omu kurwara, kitalikyo busaho kunihira.

¹⁵Omutima ogw'amagezi, gutunga amagezi, kandi okutu kw'omwetegereza, kuserra kumanya.

¹⁶Ekisembo ky'omuntu, nikyo kimutungisa ekiikaro, kandi nikyo kimwiriza omumaiso, g'abantu ab'ekitiinisa.

¹⁷Ogu owatongana kubanza arorwa nk'owamananu, kuhikiza kimu kijunanwa obw'omukaguza.

¹⁸Itomo liba kamarampaka, kandi niryo liramura abarukuhakana muno.

¹⁹Mugenzi waawe ou wakoonyiire nasisana orubuga orugumire, baitu enkungani nizisisana emihingo etanga kutaaha omukikaali.

²⁰Ebigambo omuntu eby'abaza, nibyo bimutungisa ebyokulya eby'alya akaiguta, akanwa ke, nuko kamwigusa.

²¹Orufu n'obwomeezi, biri omu busobozi bw'orulimi, abantu abanyakurugonza, balitunga ebi rulibaha.

²²Omusaija anyakutunga omukazi omurungi, aba atungire ekintu ekirungi, kandi MUKAMA aba amugiriire embabazi.

²³Abantu abanaku, babaza nibeesengereza baitu abaguuda, bagarukisaamu obukaya.

²⁴Haroho abantu abanyakweyeta ngaanjani, kandi kunu tibali ngaanjanikwo ez'amazima, kandi haroho enganjani nfenanfe okukira owanyoko nkooku muzaarwa.