Read Runyoro - rutooro Nfu 19 Bible Online

Nfu 19 - Runyoro - rutooro bible

Nfu 19

¹Omunaku omurungi, akira kirimagezi ogu, empyangya kandi omudoma.

²Omuntu, tikimuhikiriire kuburwa amagezi, kandi ogu anyakwiruka muno, ahingura irembo.

³Obudoma bw'omuntu obu bumara kumuhwerekereza, nubwo atandika kujunaana MUKAMA.

⁴Itungo, lyohereza abantu baingi kuganjana n'omuguuda, baitu omuntu omunaku, n'ayali ngaanjani ye, emurugaho.

⁵Kaiso engobya, taligurukwa kifubiro, kandi n'omuntu embiihi y'ebisuba, talijunwa.

⁶Abantu baingi, bagonza kugaanjana n'omuntu omwenda, kandi buli muntu, agonza anyakugaba ebisembo.

⁷Abaanyina omuntu omunaku, boona bamunoba, banywani be abakira obwingi, bahwaho!

⁸Omuntu anyakutunga amagezi, ayegonza, anyakwikara n'obwetegereza, alitunga omugisa.

⁹Kaiso engobya taligurukwa kifubiro, kandi n'embiihi y'ebisuba egi, erihwerekerra.

¹⁰Tikihikire, omudoma kwikara omu kwegonza, kandi okukira muno, tikisemeriire omwiru rubaale kulema ab'ekitinisa.

¹¹Okwetegereza, kutanga omuntu kubiihirwa bwango, kandi okutafaaho ensobi, kimutungisa ekitiinisa.

¹²Ekiniga ky'omukama kisisana kurrurruma kw'entale, baitu embabazi ze, zisisana orume orutoonyere ha bunyansi.

¹³Omwana omwojo omudoma, ahwerekereza ise, kandi enkungani y'omukazi, esisana enjura etakya.

¹⁴Amaju n'itungo, abantu babigweterwa baisebo, baitu omukazi omwerinzi, agabwa MUKAMA wenka.

¹⁵Obuturumuki, bugwijagiza muno omuntu, omuntu enturumuki, araikaraga naarumwa enjara.

¹⁶Omuntu anyakukwata Ebiragiro, nuwe alinda obwomeezi bwe; baitu anyakubigaya, alifa.

¹⁷Omuntu anyakugirra abanaku embabazi, ayohoza MUKAMA, kandi MUKAMA, alisasura omuntu ogu eki akozire.

¹⁸Ohane omwana waawe hakyaroho okunihira kakuba otamuhana omu kasumi ako, buli wamuleka kuhwerekerra.

¹⁹Omuntu anyakwina ekiniga ekingi, alifubirwa habwokuba kakuba omujuna omurundi gumu, olihambirizibwa kumujuna obw'akabiri.

²⁰Otegege okutu, ohurre ebi barukukugambira, kandi oikirizeege ebi barukukuhana, nukwo otunge amagezi, omu biro eby'omumaiso.

²¹Omuntu noobu ategeka ebirukwingana ha, baitu MUKAMA eki yategekere nikyo kihikirizibwa.

²²Omuntu eky'asemerra kuba nakyo nubwo obwesige, kandi omuntu omunaku, akira embiihi y'ebisuba.

²³Okutiina MUKAMA, nikyo kitwara omu bwomeezi omuntu anyakumutiina, aikara agwagwaine, akabi tikalimuhikaho.

²⁴Omuturumuki, akoza omu kibindi, baitu alemwa kwetamika entonge ei akoleze.

²⁵Teera ow'emigayo abasema nukwo beege okwegendereza hana omuntu omwetegereza alyeyongera kumanya.

²⁶Omwana anyakuhaahaaza ise kandi akabinga nyina, omwana ogu aba muhemu kandi aswaza.

²⁷Mwana wange, obu, olireka kwega n'ebi wasangirwe wayega, olibinaga bwango.

²⁸Kaiso atali w'amazima, agaya obwinganiza, abantu ababi, bagonza obubi.

²⁹Ensekerezi zikateekanirizibwa kucwerwa omusango, emigongo y'abadoma, ekateekanirizibwa kukaturwa emigo.