Read Runyoro - rutooro Nfu 2 Bible Online

Nfu 2 - Runyoro - rutooro bible

Nfu 2

¹Mwana wange, kakuba ohurra ebigambo byange, okakwata ebiragiro byange,

²okatega okutu okuhurra amagezi, kandi okata omutima ha kwetegereza;

³ego, obw'oliitanira amagezi okeekambira okwetegereza,

⁴amagezi ago, obw'oligaserra nk'arukuserra efeeza, okagaronza nk'arukuserra itungo eryaaserekerwe;

⁵obu, nubwo olyetegereza kutiina MUKAMA, kandi nubwo olizoora amagezi ag'okumanya Ruhanga.

⁶Habwokuba, MUKAMA nuwe agaba amagezi; omu kanwa ke, nuho haruga amagezi n'okwetegereza;

⁷nuwe ayahurra abarungi amagezi agahikire; nuwe ngabu y'abo abakora ebirungi,

⁸nuwe alinda abo abanyakukuraatira obwinganiza n'alinda emihanda y'abarukwera.

⁹Obu, nubwo olyetegereza obuhikiriire, obwinganiza, n'oburungi nubwo olimanya oburungi, kandi na buli muhanda gwona omurungi.

¹⁰Habwokuba, amagezi galikutaaha omu mutima kandi obwetegereza, nubwo bulisemeza omwooyo gwawe;

¹¹obukwatampora bulikurolerra; obwetegereza bulikulinda;

¹²bulikutanga kukora kubi bulikwiha omu muhanda gw'obubi bulikwihaho ebigambo kahwerekereza,

¹³abo, abaruga omu mihanda ey'obuhikiriire, bakakwata emihanda, erukutwara omu mwirima gw'ekibi,

¹⁴abasemererwa okukora kubi, kandi nibakyanganukira obucwangya;

¹⁵kandi abakwasire emihanda enyakuramaire, abo abarukubugabuga.

¹⁶Olitabuka omukazi omunyarwanju, olikira obubi oburuga omu bigambo bye ebirukuheheera,

¹⁷omukazi ogu, anyakugobeza iba wonyini kimuswera, akeebwa ekiragaano eki yaragaine na Ruhanga we.

¹⁸Kwirra enju ye, oba nooyegemurra kagingo. Kugenda oku, nukwo kwirirra ensi ey'abafu.

¹⁹Busaho n'omu anyakumubungira akagaruka mbere arugire, ogu, obwomeezi aba aburagire.

²⁰Habweki, okuraatirege abantu abarungi, kandi oikalege n'abahikiriire.

²¹Habwokuba, abataina kamogo nubo balirya ensi, kandi abesigwa, nubo baliigiikaramu.

²²Baitu ababi, balihwerekerezibwa baruge omunsi, kandi encwangya zirimeenywamu.