Read Runyoro - rutooro Nfu 21 Bible Online

Nfu 21 - Runyoro - rutooro bible

Nfu 21

¹Omutima gw'omukama, hali MUKAMA, gusisana nk'akambu k'amaizi akaakwasire omu ngaro, agutomesa hoona h'arukwenda.

²Ekintu kyona omuntu eky'akora, akyeta kirungi, baitu MUKAMA nuwe alenga omutima.

³Okukora ebirungi kandi eby'obwinganiza, MUKAMA akisiima, okukira ekyonzira.

⁴Amaiso gemyehurro, omutima ogw'emyehembo, n'etaara y'ababi, byona bibi.

⁵Entegeka z'omuntu omwekambi, zireeta omweru mwingi, baitu omuntu anyakukwata, pakupaku ainara.

⁶Itungo eriruga omu bucwangya, licuucuuka nk'omwika, kandi nugwo omutego ogw'orufu.

⁷Obuhoogozi bw'ababi nubwo bulibahwerekereza habwokuba bakanga kukora eby'obwinganiza.

⁸Omuhanda gw'ababi tiguterekeriire, baitu abantu abarungi bakora ebirungi.

⁹Kirungi okuraara ha nsonda y'orusu rw'enju, okukira okuraara omunju, enyakurumu omukazi omukungani.

¹⁰Obutoosa, ababi baikara nibenda kukora ebibi, tibaina n'omu, ou bagirra embabazi.

¹¹Omuntu ow'emigayo obu afubirwa, omusema aho nuho aiha okwetegereza; omuntu ow'amagezi obu ahaburwa, nubwo atunga kumanya.

¹²Ruhanga Omuhikiriire, amanyire ebinyakukorwa omu maju g'ababi, kandi ababi abo, alibahwerekereza.

¹³Omuntu anyakweyiita amatu akanga kukonyera omunaku arukutaaga, na uwe alitaagira omuntu ondi, baitu talikonyerwa.

¹⁴Ekisembo ekinyakugabwa omu nsita, kiihaho omuntu ekiniga kandi enguzi enyakuheebwa ekwatiirwe omu kikondooro, emaraho obukaya bwingi.

¹⁵Ekintu obu kikorwa omu bwinganiza, abahikiriire baba n'omuhimbo baitu enkozi z'ebibi igweerwa.

¹⁶Omuntu anyakuhaba omuhanda ogw'obwetegereza, alihumurra omu kitebe ky'abafu.

¹⁷Omuntu anyakwemarra ha by'okwesemeza, aliba mwinazi kandi anyakweha amarwa n'ebyokulya ebirungi, taligudahara.

¹⁸Omubi nuwe ayereetera akabi, akaabaire naguza kuleetera omurungi.

¹⁹Ekirukukira oburungi nukwo kwikara omwibuga, baitu otaikaire n'omukazi omunyankungani, kandi omunyakiniga.

²⁰Abantu ab'amagezi, nubo baikara n'itungo n'okwegonza, bataina ekirukubaburaho, baitu abadoma, sente zaabo baimaraho nibakyazitunga bati.

²¹Anyakuserra obuhikirire n'embabazi, alizoora obuhangaazi n'ekitiinisa.

²²Omuntu ow'amagezi, atemberra orubuga orw'abamaani, aseesa ekigo eki baayesigaga.

²³Omuntu anyakwerinda ebigambo eby'abaza, kandi anyakukwata akalimi, ogu, ayeriinda akabi.

²⁴“Nyamyetuguliko” niryo ibara ery'omuntu omweekuliriza kandi arukwemanya muno, nuwe ogu anyakukora naayoleka okwekuliriza okwingi.

²⁵Okwegomba kw'omuturumuki nukwo kumwita, habwokuba, emikono ye ekanga kukora.

²⁶Omuntu omubi aiza obwire naayegomba, baitu omuhikiriire, uwe abwiza naagaba kandi taima.

²⁷MUKAMA tagonza byonzira by'abantu ababi, munomuno obu babireeta nibagenderramu ekintu ekibi.

²⁸Obwakaiso obw'omubiihi w'ebisuba, tibwikirizibwa, baitu ekigambo ky'omuntu anyakutekereza muno ebigambo, nikyo kiikirizibwa.

²⁹Omuntu omubi ayegumyagumya, omurungi ateekereza ebyakora.

³⁰Tiharoho magezi, okumanya, n'okuhaburwa ebisobora kutanga MUKAMA kukora eky'arukwenda.

³¹Omuntu asobora kuteekaniza embaraasi ez'okurwana obulemu baitu MUKAMA nuwe agaba obusinguzi.