Read Runyoro - rutooro Nfu 22 Bible Online

Nfu 22 - Runyoro - rutooro bible

Nfu 22

¹Oitanirege ibara erirungi okukira itungo eringi, abantu okukutamu ekitiinisa, ky'omuhendo okukira efeeza rundi ezaabbu.

²Abaguuda n'abanaku, batangatangana; MUKAMA, boona nuwe yabahangire.

³Omuntu omwegendereza arora akabi akeehugura, baitu omudoma akeenagamu, asaalirwa amazire kukagwamu.

⁴Empeera y'okwebundaaza n'okutiina MUKAMA nubwo obuguuda, ekitiinisa n'obwomeezi.

⁵Omuhanda gw'abagonza okukora obubi, gwikarwamu amahwa n'emitego. Omuntu anyakwerinda, ebi abyetantara.

⁶Yoroora omwana omukwase engeso ezi asemeriire kuba na zo, noobu alikura, engeso ezi taliicwa.

⁷Abaguuda nubo balema abanaku kandi kyohozibwa aba mwirurubaale wa kimwohoza.

⁸Omuntu anyakusiga obutainganiza, aligesa omuhito kandi omwigo gw'ekiniga kye, nuwe guliteera.

⁹Omuntu anyakuroza eriiso ery'obwenda, aliheebwa omugisa, habwokuba alya aiguta.

¹⁰Obingege omuntu ow'emigayo, buli empaka ihoire, kandi enkungani n'ebijumo buli bicwekiire.

¹¹Omuntu anyakugonza oburungi bw'omutima, kandi anyakubaza ebigambo eby'embabazi, nuwe aliba nganjani y'omukama.

¹²MUKAMA, agonza muno amazima galindwe nikyo atagumiza ebigambo by'ababiihi b'ebisuba.

¹³Omuturumuki aikara naagamba ati: “Aheeru haliyo entale; niija kunnaga omu muhanda!”

¹⁴Akanwa k'omukazi malaaya, nubwo obuhya obuhamire, kandi omusaija ogu MUKAMA ou abiihiriirwe nuwe abutoora.

¹⁵Obudoma buzaarwa omu mutima gw'omwana, baitu kumuhana n'omwigo, nukwo kubumumaramu.

¹⁶Omuntu anyakubonesa abanaku, uwe nukwo ayeyongere kutunga rundi anyakugabira abaguuda, aliinara.

¹⁷Otegege okutu ohurre ebigambo eby'ab'amagezi, omutima gwawe ogumarre ha magezi gange.

¹⁸Obw'oraikaraga noobiijuka, kandi byona obw'oraikaraga noobibaza, kiriba kirungi.

¹⁹Habwokuba, ninyenda oyesigege MUKAMA, nikyo mbikumanyisiize iwe wenka, kiro kya hati.

²⁰Ntakuhandiikire enfumo amakumi asatu ez'okuhabura kandi ez'amagezi, ikukonyere

²¹nukwo osobole kumanya ekihikire kandi ekyamazima, n'okugambira abaakutumire ebigambo ebinyakuhikire?

²²Otalinyaga omunaku, noomutura obunaku bwe, kandi otalibonabonesa ha irembo, omuntu anyakuli omu muhito,

²³habwokuba, MUKAMA alibatonganirra, aite abo abanyakubanyaga ebintu byabo, abanyage obwomeezi bwaabo.

²⁴Otaliganjana n'omuntu omunyakiniga, kandi olekege kuteera ekisimba, n'omuntu ow'obukaya,

²⁵otaliikara kukwata engeso ze, okeenaga omu mutego.

²⁶Otaliba nk'omu, hali abo abanyakuha omusimbo, nk'abo abanyakwemera abali b'amabanja!

²⁷Obw'oliburwa eky'okusasura ekitabu kyawe obyamaho nikyo balitwara.

²⁸Otaliihurra omutaano ogwaira ogwatairweeho baaswenkuru.

²⁹Oboine omuntu anyakukora kurungi omulimo gwe? Ogu nuwe aliheereza abakama, taliheereza bantu abatamanyirwe.