Read Runyoro - rutooro Nfu 23 Bible Online

Nfu 23 - Runyoro - rutooro bible

Nfu 23

¹Obw'oraikarraga kulya n'omulemi, oikalege noijuka anyakukuli omumaiso gaawe

²obw'oraaba ogira omutuubo, buli oyetimba wenka omuhyo hamumiro.

³Otaliirukirra ebyokulya ebirungi eby'arukukwiriza haihi; eki asobora kukikora naagenderra kukutebura.

⁴Oyegenderezeege oleke kukora okahinguraniza ngu nukwo otunge, kandi otalyeetaho, ebintu ebyobuhoogozi.

⁵Obw'oba okyabitaireho amaiso osanga bitaroho, habwokuba bisobora kumera amapapa nk'isamba erihurruka, likatemba omu mwanya.

⁶Olekege kulya ebyokulya by'omuntu omuhoole; otalyegomba ebyokulya bye ebirungi;

⁷aikara nakutebura ati: Caali weewe, garuka olye, kandi onyweho kandi kunu tarukwenda olye.

⁸Ebyokulya byona eby'oliire olibitanaka, okuhaisirizibwa kwaawe kuliba kuhoireho.

⁹Olekege kubaliza omudoma, habwokuba aligaya amagezi g'ebigambo byaawe.

¹⁰Otaliihurra omutaano ogwa ira rundi otalitaahirra ebibanja by'enfuuzi;

¹¹habwokuba, Omucunguzi wabo w'amaani, omusango orukubajunaana, aligubatonganirra, atongane na iwe.

¹²Omutima gwawe ogumarrege ha kuhaburwa, kandi otegege amatu, ohurre ebigambo eby'amagezi.

¹³Olekege kuganyira omu kworoora omwana, kumurabyaamu akaigo, eki tikirukumwita.

¹⁴Kumurabyamu akaigo nikyo kirimutanga kugenda Nyabuyonga.

¹⁵Mwana wange, obw'oligira omutima ogw'amagezi omuhimbo guliraarra kunyita.

¹⁶Obu ndikuhurra noobaza ebigambo eby'amagezi, ndikyanganuka muno.

¹⁷Olekege kukwaatirwa ihali abasiisi, izooba lyoona oyemarrege ha kutiina MUKAMA.

¹⁸Manunukwo, haroho akasumi ak'ebiro eby'omumaiso, baitu okunihira kwawe tikuliba kwa busa.

¹⁹Mwana wange, hurra kandi obege w'amagezi, omutima gwaawe, ogumarre ha mulingo ogu oinagwo hati.

²⁰Otaliteera ekisimba n'abo, abanyakwetwa kinywabwato, n'abo abarurukira enyama;

²¹habwokuba, omutamiizi n'ow'omukoijo, tibalitunga. Kandi engwijagizi eraajwaraga ebitengo.

²²Ohurrege sso ayakuzaire, kandi nyoko obu aliba akaikwire, otalimugaya.

²³Ogule amanamu, kandi otaligaguza; ogule amagezi, okuhaburwa n'okwetegereza.

²⁴Omusaija ayazaire omwana omurungi, arakyanganukaga muno anyakuzaara omwana ow'amagezi, amwehuliza.

²⁵Obege kusemererwa kwa sso na nyoko, omukazi ogu ayakuzaire, aikalege naakyanganuka.

²⁶Mwana wange, mpa omutima gwaawe, kandi obwomeezi bwange; nubwo bube ky'okurorraho kyaawe.

²⁷Habwokuba, omukazi malaaya, buhya obuhamire; omukazi enkuuhya, iziba erifunzire.

²⁸Aikara abundaire nk'omunyagi, kandi abiihabiiha abasaija baingi.

²⁹Muntu ki anyakugira obujune? Muntu ki anyakugira obusaalizi? Muntu ki anyakugira empaka? Muntu ki anyakwikara natontorroma? Muntu ki anyakuhutaazibwa hataroho bulyo? Anyakwikara amaiso gamwengere?

³⁰Nubo abo abaikara ha marwa batarukwenda kugaimukaho, nubo abo abaikara nibaserra aganyakutabwirwe kurungi.

³¹Olekege kurolerra amarwa agarukutukura, nkooku garukubimba omu kikopo. Kandi nkooku garukusirimuka mpora mpora.

³²Hanyuma, gatema nk'enjoka, gasosoigira nk'empoma.

³³Nubwo otandike kurora ebintu nk'ebi otakabonaga, n'okuteekereza ebintu ebitahikire.

³⁴Olisisana nk'omuntu anyakubyamire omu nziha y'enyanja, osisane nk'omuntu anyakubyamire haruguru y'omurongooti.

³⁵Ogambe oti: “Bantiire, baitu timputaire; Bantiire, baitu tindukuhurra nkooku ntiirwe. Haa boojo, ndaimukadi nkagya kweserurra agandi?”