Read Runyoro - rutooro Nfu 24 Bible Online

Nfu 24 - Runyoro - rutooro bible

Nfu 24

¹Otalikwatirwa ihali abantu ababi, kandi otalyeegomba kwiikara na bo;

²habwokuba, emitima yabo ikara neeteekereza obubi kandi akanwa kaabo, kaikara nikabaza eby'itima.

³Amagezi, nugo gombeka enju, kandi obwetegereza, nubwo bugigumya;

⁴okumanya, nukwo kwijuza omu bisiika ebintu eby'omuhendo kandi ebirungi.

⁵Omuntu ow'amagezi, aba w'obusobozi okukira ow'amaani, omuntu arukumanya, akira kirimaani;

⁶habwokuba, obw'ogendera ha kwebemberwa amagezi, nubwo osobora kurwana obulemu kandi obusinguzi, buruga omu bahi b'amagezi abaingi muno.

⁷Amagezi, kintu kya haiguru muno omudoma ekyatarukusobora kwetegereza; abantu obu baba nibahanuuraho ebintu eby'omugaso, uwe tagira eki abaza.

⁸Omuntu anyakwikara naategeka kukora obubi, ibara lye, nuwe kaliitima.

⁹Entegeka y'omudoma, nukwo kukora ekibi, kandi omuntu omunyamigayo abantu tibamwenda.

¹⁰Hakiro ekyobujune obw'oraaba ogwa ensazi, buli oli w'amaani make.

¹¹Ojunege abantu abarukutwarwa kwitwa, kandi ohabulege abarukutabaijuka nibatoma omw'ifeero.

¹²Kakuba ogamba oti: “Kinu tutakimanye,” noogira, Ogu anyakwekebiija emitima eki tarukukyetegereza? Ogu anyakulinda omwoyo gwawe, takimanyire? Kandi talisasura omuntu, naamwinganiza ha mulimo, omuntu ogu, ogu yakozire?

¹³Mwana wange; olyege obwoki bw'enjoki, habwokuba bunura, n'enyondo enyakuruga omu bisasara, enura muno.

¹⁴Omanyege, amagezi na go, nukwo gasemeriire gati kunurra omwoyo gwawe; kakuba ogazoora, oliba kurungi, kandi okunihira kwawe tikuliba kwa busa.

¹⁵Olekege kwiikara obundaire, nk'omuntu omubi oku agwera amaka g'abarungi; otalinyaga eka ye;

¹⁶noobwakubaire omuntu omuhikiriire agwa emirundi musanju, kandi agaruka aimuka, baitu ababi, obubi bwabo bubahwerekerereza kimu.

¹⁷Omunyanzigwa wawe obu araagwaga omu kabi, olekege kusemererwa, kandi obu araatabaijukaga, olekege kwesiima;

¹⁸Eki, MUKAMA ataliija kukirora kikamubiihiza, akaleka kumubiihirirwa.

¹⁹Enkozi z'ebibi irekege kukutuntuza, kandi ababi balekege kukukwasa ihali;

²⁰habwokuba, omu biro eby'omumaiso omubi taina eky'arukunihira; taina na kimu, eky'aikara ategeriize; etaara y'omubi, eriraazibwa.

²¹Mwana wange, otiinege MUKAMA n'omukama abo bombi, otaligira ou oyanga kuhurra. Otalyetaho abantu n'abanyakubeemera.

²²Abantu nk'abo, basobora kuhwerekerra ahonaaho, n'oha amanyire okuhwerekerra okusobora kuleetwa ababiri abo?

²³Zinu nazo nfumo z'amagezi. Kuhenderra tikiri kirungi.

²⁴Omucwi w'emisango anyakugamba omuntu anyakwina omusango ati: “Toina musango,” ogu, alikyenwa abantu, kandi alinobwa muno amahanga;

²⁵baitu abo abanyakuhana ababi, balyesiima, kandi balihebwa omugisa.

²⁶Okugarukamu ekinyakuhikire, nuko akarorwaho, akamanyisa omuganjano ogw'amazima.

²⁷Otalyombeka enju yaawe kandi otaligumya eka otakateekaniize emisiri yaawe, kandi otakagumize, nkooku osobora kutunga ebyokulya.

²⁸Otaliba kaiso arukusingisa omutaahi omusango, otaina bulyo, kandi otaliba mbiihi y'ebisuba.

²⁹Otaligamba oti: “Ndaamukorra nkooku ankooliire; ninyija kumusasura eky'akozire.”

³⁰Nkaraba ha musiri gwa gaterra, ha rugonjo rw'emizabbibu rw'omuntu ataina magezi;

³¹nkahunirra, okurora gwona guhuukire gwijwire amahwa; kandi gusweekerwe oburaara, ekisiika kyagwo eky'amabaale, kikaseeseka ira.

³²Nubwo naroleriire, kandi nateekereza eki, ky'okwegeraho.

³³Nikyo kinu: Ka ngwijagireho kake, ka nzibirizeeho kake, ka mbuumbe emikono kake, mpuumuleho,

³⁴oliizirwa, obunaku nk'omunyagi oku aija, oliizirwa amaseege, nk'omuntu anyakwina ebyokurwanisa.