Read Runyoro - rutooro Nfu 25 Bible Online

Nfu 25 - Runyoro - rutooro bible

Nfu 25

¹Zinu nazo nfumo za Solomooni ezaakoporoirwe abantu ba Hezekiya Omukama wa Yuda.

²Ekitiinisa kya Ruhanga, nukwo kusereka ebintu baitu ekitiinisa ky'abakama, nukwo kukyekebiija.

³Iguru nkooku liri hara muno, kandi n'ensi nkooku ehamire mali, n'omutima gw'omukama nukwo gutasobora kwetegerezibwa guti.

⁴Efeeza obw'ogiihamu ebyenga, buli omuheesi yatunga ekintu eky'arukwenda kukoramu ekikwato;

⁵iha ababi omumaiso g'omukama, obulemi bwe bulimanywa nkooku buli bulemi bw'obwinganiza.

⁶Olekege okwetwaara omumaiso, nambere hali omukama, rundi kwemerra, omu kiikaro ky'abantu ab'ekitiinisa;

⁷Baitu hakire bakugambira ngu “Temba hanu:” okukira okubundazibwa omumaiso g'omukuru, ouwaboine n'amaiso gawe.

⁸Eki oboine, olekege kwanguhiriza kukitwara omu bulemi; hanyuma kakuba habaho kaiso arukugumya ensobi nkooku eri yaawe, obw'olikora ki?

⁹Obw'oraaba oine empaka n'omutaahi, empaka ezi muzeemarre inywenka, muleke kusiiba mwaturukize ensita;

¹⁰kakuba mutazemarra, buli muntu naija kumanya nkooku otasobora kwahura ensita, kandi tolyejuna kihemu eki.

¹¹Ekigambo ekinyakugambirwa nambere kisemeriire, kisisana ebijuma eby'ezaabbu ebinyakuli omu kigega eky'efeeza.

¹²Omuntu anyakuhana n'amagezi, hali ogu arukumuhuliriza, asisana nk'empeta ey'ezaabbu rundi ekintu eky'omutooro eky'ezaabbu.

¹³Omukwenda omwesigwa, hali abo abamutuma, asisana nk'amaizi agarukufuka omuntu aga anywa, omu bwire bw'igesa. Aruhuura omutima gwa bakama be.

¹⁴Omuntu anyakwenyumiriza ha kisembo, kandi kunu taakigabe, ogu asisana nk'ebicu n'omuyaga ebitanaga njura.

¹⁵Omulemi asobora kutwalirizibwa mporampora n'okugumiisiriza, kandi orulimi orurukuheheera nurwo rworobya omuntu.[1]

¹⁶Obw'oraatungaga obwoki, olyehoga oburukumara otaliija kulya obuhinguraine, kandi okabutanaka.

¹⁷Olekege kwikara noogendagenda mb'omutaahi, ataliikara kukutamwa kandi akakunoba.

¹⁸Omuntu anyakuhangirra omutaahi ogu aba mwisi nk'ekiduuma ekinyakukwatwa omu bulemu, nk'empirima rundi nk'omusogi ogutoire.

¹⁹Okwesiga omuntu enteesigwa omukasumi ak'obulemeezi, kusisana nk'okufutana ekintu, n'eriino erirukutengeeta rundi kurubasa ekigere ekiramaire.

²⁰Okuzinira omuntu anyakuli omu bujune, kusisana nk'okujuura omuntu ekyokujwara kye ha kiro eky'embeho, rundi nk'okumamirra ekisura omu buhuta.

²¹Omunyanzigwa waawe obu araabaga naarumwa enjara, omuhege ebyokulya alye, kandi obu araabaga aina iroho, omuhege amaizi anywe;

²²habwokuba obu, oliba noomukumira ha mutwe amakara g'omurro, agatuumire agarukutukura tuku, kandi MUKAMA alikuheera empeera.

²³Omuyaga ogwa bukiizi bw'emoso gunaga enjura; kandi orulimi orunyakugeya, nurwo rukwasa omuntu ekiniga.

²⁴Kirungi okuraara omu karugu k'orusu rw'enju eruguru, okukira okuraara omunju, erukuraarwamu omukazi anyakukungana obutamara.

²⁵Omuntu anyakwina iroho nkooku ayenda amaizi agarukufuka, n'abantu nukwo bagonza bati kuhurra amakuru amarungi

²⁶ag'ensi eya hara. Omuntu omurungi anyakworobera omubi asisana nk'akambu akatabangukire rundi nk'iziba erifiire.

²⁷Okulya obwoki obuhinguraine nkooku kukora kubi, n'okugonza okuhaisanizibwa muno, na kwo nukwo kukukora kuti.

²⁸Omuntu atasobora kwetanga asisana nk'orubuga orwataahirwemu rwaikara rutaina bisiika.