Read Runyoro - rutooro Nfu 26 Bible Online

Nfu 26 - Runyoro - rutooro bible

Nfu 26

¹Nk'ebirika oku biteetagwa omu kasumi k'ekyanda, n'enjura nkooku eteetagwa omu kasumi k'igesa, nukwo kitasemeriire omudoma, okuheebwa ekitiinisa.

²Nk'ekisirya oku kiikara nikifurafuruka kandi nk'entaahi oku ikara neehurahurruka, n'omukyeno ogutaina busigikiro nukwo gutasobora kuhikaho muntu.

³Embooko eba y'okuteeza embaraasi enkoba ziba z'okubohesa enkaina, kandi omwigo, guba gw'okuteeza emigongo y'abadoma.

⁴Otaligarukamu omudoma eky'obudoma eky'akagwize, na iwe otaliija kuba mudoma nka uwe.

⁵Garukamuga endoma, omu mulingo gwayo ogw'endoma nukwo ereke kweyeta y'amagezi.

⁶Omuntu anyakutuma omudoma kutwara obukwenda, ayecwa wenka ebigere, kandi ayenaga omu kabi.

⁷Nk'amaguru g'omulema oku gaikara nigasuuleeba n'orufumo orucwerwa abadoma nukwo rutagira mugaso.

⁸Omuntu anyakuha omudoma ekitiinisa, asisana arukubohera ibaale ha mwesuuso.

⁹Orufumo orunyakucwiibwa abadoma, rusisana nk'ihwa, erinyakuteera omukono gw'omutamiizi.

¹⁰Omuntu anyakuha omulimo omudoma arukuhingura rundi omutamiizi, asisana omurasi w'emisogi, anyakuhutaaza buli muntu.

¹¹Omudoma anyakugarukamu eby'obudoma eby'akora, asisana nk'embwa enyakugarukira ebitanaki byayo.

¹²Oraboine omuntu arukweyeta w'amagezi? Abantu abakira obwingi, banihiramu omudoma ebirungi, okukira ebi banihira omuli ogu.

¹³Gaterra, aikara naagamba ati: “Mawe, leeba entale eri omu muhanda! Orole entale eri mumakuute!”

¹⁴Orwigi nkooku rwikara niruhindahindukira ha pata zaarwo, gaterra na uwe, nukwo aikara naayehindahindurra ha kitabu kye.

¹⁵Gateerra, akoza entonge omu kibindi, baitu kimulemerra muno kugyeetamika.

¹⁶Gaterra ayeyeta w'amagezi, okukira abantu musanju abanyakugarukamu n'amagezi.

¹⁷Omuntu anyakwetahya omu nkungani omu bintu ebitarukumukwataho asisana nk'ogu anyakukwata amatu, embwa erukuhingura.

¹⁸Omuntu anyakubiihabiiha omutaahi naagamba ati: ninsandaara kwonka

¹⁹Asisana nk'omugu w'iraro, anyakuhungura ensaso, emisogi, n'orufu rwonyini.

²⁰Omurro obu guburwamu enku, buli gwaraara; na nambere habura omuhwehweterezi, tihabaho nkungani.

²¹Nk'amakara oku gengesibwa ebicumuro, n'omurro oku gwakibwa enku, n'omuntu omunyankungani, nukwo aimukya empaka ati.

²²Ebigambo by'empwehweterezi bisisana nk'entonge ezirukunura; bitaahira kimu, ebicweka by'omunda eby'omubiri.

²³Ebigambo ebitali by'amazima n'ebitarukwoleka eky'orukuteekerezakwo, bisisana nk'erangi enyakusiigirwe ha kinaga eky'ibumba.

²⁴Omuntu ow'enobi, abiihabiiha abantu n'ebigambo bye, kandi, asereka obugobya omu mutima gwe.

²⁵Noobu araakubalizaaga ebirungi bita, otalimwikiriza, habwokuba aina ebibi musanju, eby'ayahwire omu mutima gwe.

²⁶Enobi ye noobu eraaba eswekeriirwe obucwangya bwe, baitu obubi bwe buzooka omu bantu aba aikara na bo.

²⁷Omuntu anyakulima obuhya, nuwe abutoora, kikumbya ibaale nuwe ligarukira.

²⁸Omuntu embiihi y'ebisuba, tayenda amananu. Omuntu kanwekanweka, nuwe aleeta kuhwerekerra.