Read Runyoro - rutooro Nfu 29 Bible Online

Nfu 29 - Runyoro - rutooro bible

Nfu 29

¹Omuntu anyakuhanwa baitu akongera kugumangana, ogu alihendeka atakirengeriire, kandi tikirisoboka kutambirwa.

²Abantu abarungi obu baba ha bulemi abantu bakyanganuka; baitu obu halema ababi, abantu beetuntura.

³Omuntu anyakugonza amagezi, asemeza ise, baitu ogu anyakweha baamalaaya, asiisasiisa abintu bye.

⁴Obwinganiza, nubwo buleetera omukama kugumya ensi baitu anyakugonza kuheebwa ebisembo, agihwerekereza.

⁵Omuntu anyakunwekanweka omutaahi, aba naayetega wenka, omutego oguramukwata.

⁶Omuntu omubi, obubi bwe nubwo bumukwata, baitu omurungi aikara, naazina kandi naasemererwa.

⁷Omuntu omurungi, amanya abanaku ebi basemeriire kutunga; baitu omubi, ebi uwe tabyetegereza.

⁸Abantu ab'emigayo, baleeta akambayaaya omurubuga, baitu abanyamagezi, baihaho abantu ekiniga.

⁹Omuntu ow'amagezi obu aleekaana n'omudoma, omudoma akwatwa ekiniga, kandi aseka, baitu nabwo, tihabaho businge.

¹⁰Abantu abanyakugonza kuseesa esagama, banoba omuntu omurungi, kandi ababi benda kumwita.

¹¹Omudoma ayolekera kimu ekiniga kye, baitu omuntu ow'amagezi, alema ekiniga kye.

¹²Omulemi obu aikiriza ebisuba, abanyoro be boona baba babi.

¹³Omuntu omunaku n'ogu kimubonabonesa, baba omu kiikaro kimu; bombi, MUKAMA nuwe abamulikira.

¹⁴Omukama kakuba acwera abanaku emisango omu bwinganiza, obukama bwe, bulihangaara ebiro n'ebiro.

¹⁵Omwigo n'okuhana, nibyo bireeta amagezi, baitu omwana omweremi, aswaza nyina.

¹⁶Abantu ababi obu baba ha bulemi, obubi bweyongera; baitu abarungi, balisunga ababi nibahwerekerra.

¹⁷Yoroora omwana wawe, nubwo alikuhuumuza, asemeze omutima gwawe.

¹⁸Ihanga eriteebemberwa Ruhanga, tiriterekerra. Ka muhiirwa omuntu ogu, anyakukwata Ebiragiro bya Ruhanga.

¹⁹Ebigambo bugambo tibisobora kuhana omwiru, habwokuba, noobu akenga, tataho mutima.

²⁰Dora omuntu anyakwanguhya ebigambo? Omudoma, naanihirwamu bingi okukira ogu.

²¹Omuntu anyakuningirika omwiru we kuruga ha buto, kiro kimu, ogu nuwe aliba mugwetwa we.

²²Omuntu ow'obukaya, nuwe kaimukya mpaka, kandi omuntu omunyakiniga, nuwe kaleeta obubi bwingi.

²³Emyehembo y'omuntu erihemura baitu anyakwebundaaza, aliheebwa ekitiinisa.

²⁴Anyakuteerana n'omusuma, aba anobere obwomezi bwe noobu ahurra nibamukondereza, baitu taranga kintu na kimu.

²⁵Okutiina omuntu nukwo kwetega omutego? Baitu anyakwesiga MUKAMA, nuwe alitunga obusinge.

²⁶Abantu baingi benda kuganja hali abalemi, baitu MUKAMA wenka, nuwe asobora kukoorra omuntu obwinganiza.

²⁷Omuntu atali w'obulyo muziro hali abahikiriire, kandi ow'amazina muziro hali ababi.