Read Runyoro - rutooro Nfu 3 Bible Online

Nfu 3 - Runyoro - rutooro bible

Nfu 3

¹Mwana wange otalyebwa ebi ndukukwegesa, baitu leka omutima gwawe gukwatege ebiragiro byange;

²habwokuba, eki nikyo kirikuhangaaza kandi kikugwagwanize.

³Obutoosa obege w'amananu kandi mwesigwa; ebi obijwalege omu bikya nk'orukwanzi, obihandiike omu mutima gwawe.

⁴Obu, nubwo oligirirwa embabazi kandi osiimwe Ruhanga n'abantu.

⁵Oyesigege MUKAMA n'omutima gwawe gwona, olekege kwesiga amagezi gawe gonka.

⁶Hoona nambere oraagendaga, omwesigege, emihanda yaawe araagikuterekererezaaga.

⁷Olekege kwebiihabiiha okeeyeta w'amagezi; otiinege MUKAMA, kandi ofuuhyege obubi,

⁸obw'olikora oti, eki nikyo kiriba nk'omubazi omurungi ogutambira omubiri gwawe, oguhuumuza amagufa gaawe.

⁹Otemuga MUKAMA ekitiinisa, noomuha ha bintu byawe, na ha muganuro ogwa byona ebyoyereze;

¹⁰obw'olikora oti, enguli zawe nubwo ziriijura oburo n'entugiro zaawe nubwo ziriijura eviini.

¹¹ Mwana wange, otaligaya MUKAMA eby'akuhabura, rundi kutamwa eby'akuhana,

¹²habwokuba nka ise mwana oku ahana omwana we enganzi, MUKAMA na uwe nukwo ahana ou agonza.

¹³Muhiirwa omuntu ogu, anyakuzoora amagezi, n'ogu anyakutunga okwetegereza.

¹⁴Habwokuba, amagoba agaruga omuli eki, nigakira agaruga omu feeza, kandi g'omuhendo okukira ezaabbu.

¹⁵Amagezi g'omuhendo okukira amabaale ag'omuhendo. Busaho kintu na kimu eky'orukugonza, eky'osobora kukirengesaniza na go.

¹⁶Omu mukono gwago ogw'obulyo, gakwasire obuhangaazi, omu gw'emoso gwakwasire obuguuda n'ekitiinisa.

¹⁷Emihanda yago, mihanda y'okusemererwa, obuhanda bwago bwona buleeta obusinge.

¹⁸Nugwo omuti ogw'obwomeezi hali abo abagakwataho, abo abanyakugakwatira kimu bakagagumya, beetwa bahiirwa.

¹⁹MUKAMA, amagezi nugo yayombekeseze ensi, obwetegereza nubwo yagumisize iguru.

²⁰Amagezi ge nugo gageza ebyambu, nugo garagira ebicu kunaga enjura omunsi.

²¹Mwana wange, ogumirege ha magezi amarungi, nahabwegendereza kandi ebi, otalibirugaho,

²²biriba bwomeezi bw'omwoyo gwawe, nibyo biriba kintu eky'okwekunisa omu bikya byawe.

²³Nubwo oligenda n'obusinge omu muhanda gwawe, kandi tolyesiitara.

²⁴Obw'oraikarraga hansi, toogirege eky'orukutiina, obw'oraabyamaga, oraanulirwaga oturo twawe

²⁵olekege kutiina ekikanga eky'ahonaaho rundi kuhwekerezibwa ababi obu baraaseesaga;

²⁶habwokuba, MUKAMA alikulinda kurungi, talikuleka okakwatwa omutego.

²⁷Akasumi koona obw'oraabaga noosobora, okorrege kurungi, abo abarukwetaaga kukolerwa kurungi.

²⁸Obw'oraabaga oina ekintu, otaligambira omutaahi oti; “Genda oraagaruka, nyenkya nubwo ndakikuha.”

²⁹Otalitegeka kunaga omu kabi omutaahi anyakukuheriire kandi arukukwesiga.

³⁰Omuntu ataina kibi eky'akukozire, otalimukunganiza, otaina h'orukusigikira.

³¹Otaligirra ihali omuntu omunyagi, kandi otalirengaho kukora nk'eby'arukukora;

³²habwokuba, MUKAMA anoba muno enkozi y'ebibi, baitu ayesiga abarungi.

³³Akyena enju y'omubi, aha omugisa obwikaro bw'abahikiriire.

³⁴Agaya abagira emigayo, baitu agirra embabazi abeebundaaza.

³⁵Abanyamagezi baliheebwa ekitiinisa, baitu abadoma baliswazibwa.