Read Runyoro - rutooro Nfu 30 Bible Online

Nfu 30 - Runyoro - rutooro bible

Nfu 30

¹Ebigambo bya Agura mutabani wa Yaake Maasa. Omuntu ogu, akagamba Ityeri, Ityeri na Ukali:

²Mananukwo, ndi mudoma anyakuhinguraine, atasemeriire kwetwa muntu. Tinyina magezi nk'ag'abantu.

³Tinkeegaga magezi, kandi n'Ogu Arukwera, timmumanyire.

⁴N'oha ayatembere omwiguru, kandi akagaruka akasirimuka omunsi? N'oha ayasoroize omuyaga, akagubumbaatira omu ngaro ze? N'oha ayazingiire amaizi omu kyokujwara? N'oha ayataireho emitaano y'ensi yoona? Ibara lye nuwe oha? Kandi ibara ly'omwana we niryo liha? Obworaaba ogamanyire!

⁵Ekigambo kyona Ruhanga eki yagambire, ky'amananu nuwe ngabu y'abo; abanyakumwebinga.

⁶Ebigambo bye otalibyongeraho, ataliija kukubiihirirwa, kandi okeetwa mubiihi w'ebisuba.

⁷Ruhanga wange, ntakafiire, ninkusaba ompe ebintu bibiri:

⁸onyiheho obucwangya n'okubiiha ebisuba; otanyinaza kandi otantungisa ompege ebyokulya ebi ndukwetaaga,

⁹ntaliija kulya nkaiguta, nkakwehooga ningamba nti: “Kandi si, MUKAMA nuwe oha?” Rundi ntaliija kuba munaku nkaiba nkakugayisa, iwe Ruhanga wange.

¹⁰Omuheereza otalimugeyera mukama we, ataliija kukukyena, okagwerwa omusango.

¹¹Haroho abantu abanyakukondereza baisebo kandi abatasabira baanyinabo oburungi

¹²Haroho abantu abeeyeta barungi, kandi kunu babi muno muno.

¹³Haroho abo abeekuliiriza muno, murole nkooku barukurora n'emyehembo, murole nkooku barukugayisa abandi amaiso!

¹⁴Haroho abo, abanyakwina amaino agarukusisana empirima, abanyakwina amaino agarukusisana emihyo, batemateme, kandi bajunjubule abanaku babaihe omunsi, empwerwa baziihe omu bantu.

¹⁵Omunyoli gwina bahara baagwo babiri; baikara nibamirra bati: “Mpa, Mpa.” Ebiro n'ebiro haroho ebintu bisatu ebitaniha, kandi haroho bbina, ebitakagambaga ngu: “naiguta” ebintu ebi, nibyo binu:

¹⁶Nyabuyonga, enda engumba, ensi enyakwikara nerakarakira amaizi, n'omurro ogutakagambaga guti: “Lekera aho enku.”

¹⁷Eriiso omuntu ery'aroza ise n'emigayo, kandi ery'aroza nyina n'emyehurro, nirikanokorwemu ebingoora eby'omu kihanga, likasomwa amasega.

¹⁸Haroho ebintu bisatu ebirukumpuniriza muno; kandi haroho bbina ebi ntarukwetegereza nibyo binu:

¹⁹omuhanda ogurabwamu isamba omu mwanya, omuhanda, enjoka ogu erabamu kutemba omwandara, omuhanda, emeeri ogu erabamu ha mayanja amakooto, n'omuhanda, omusaija anyakwina omwisiki.

²⁰Omukazi omusiihani, nukwo akora ati: obu amara kulya, eyesusura eminwa nukwo agamba ati: “Tinyina kibi eki nkozire.”

²¹Ebintu ebisatu ebi, nibyo bitengeesa ensi; haroho ebintu bbina ebi etasobora kwemera, nibyo binu:

²²Nuwe omwiru rubaale, anyakulya obukama, nuwe omudoma obu alya akaiguta;

²³nuwe omukazi atakanya kugonzebwa, obu atunga omusaija ow'okumuswera; n'omuzaana anyakugweterwa ebya mugole we.

²⁴Omunsi munu, harumu ebintu ebike bbina, baitu, bintu by'amagezi agahinguraine, nibyo binu:

²⁵Enkorooto nikyo ekintu ekitali ky'amaani, baitu omu kasumi ak'ekyanda ihunika ebyokulya byazo;

²⁶enjoga, tikiri kintu ky'obusobozi, baitu nabwo, ziraara omu myandara;

²⁷enzige, tizigira mukama, baitu zigendera omu rukarra;

²⁸omunya, osobora kugukwata okagubumbaatira omu ngaro zaawe, baitu guraara omu kaaruziika z'abakama.

²⁹Haroho ebintu bisatu ebinyakurubata nibyegonza; kandi haroho bbina obu biba nibirubata ebihambiriza omuntu kubirolerra, nibyo binu:

³⁰entale, ey'amaani okukira ebisoro byona, kandi, etagira eki etiina.

³¹Enkokoromi, enyakurubata neeyegonza, empaya y'embuzi, enyakwebembera igana, n'omukama anyakurubata omumaiso g'abantu be.

³²Obw'oraaba obaire mudoma, nooyenyumiza, rundi obw'oliba waikaraga noocika kukora obubi, hati, okaguze isenkati omutima, oyekwate ha munwa!

³³Habwokuba, okucunda amata, kujwisa amagita kuteera enyindo, kujwisa esagama, kandi kukwatwa ekiniga, kuzaara empaka.