Read Runyoro - rutooro Nfu 31 Bible Online

Nfu 31 - Runyoro - rutooro bible

Nfu 31

¹Binu nibyo ebigambo Lemweri omukama wa Maasa ebigambo ebi yayegesiibwe nyina:

²Ai mwana wange Ou nayezaaliire, mwana wange ow'obwojo, iwe ou nahongiire MUKAMA, nkugire nta?

³Amaani gaawe goona oleke kugamarra ha kukora eby'ensoni kandi sente zaawe zoona, otalizimarra habakazi, habwokuba ebi nibyo byahwerekeriize abakama.

⁴Lemweri, ninkugambira: Tikihikiriire bakama kunywa amaarwa tikihikiriire balemi kwegomba muno ekyokunywa eky'amaani;

⁵bataliikara kunywa bakeebwa ekiragiro eki baataireho, bakatandika kuhenderra boona, abarukubonabonesebwa.

⁶Omuntu arukukaba, ogu nuwe ohege ekyokunywa eky'amaani, kandi amarwa, ogahege abanyakuli omu burumi bwingi.

⁷Leka abo nubo banywe, beebwe obunaku bwabo, baleke kugaruka kwijuka enaku zaabo.

⁸Baza hab'abantu ebiteta, abatasobora kwebaliza bonka. Orwanirre abo boona, abataina kikonyerwa.

⁹Obazeege, kandi ocwege emisango ey'obwinganiza, orwanirrege abanaku n'abaseege.

¹⁰N'oha asobora kuzoora omukazi omurungi? Omukazi omurungi, kintu ky'omuhendo mali okukira amabaale ag'omuhendo.

¹¹Iba, amwesigira kimu n'omutima gwe gwona kandi taligira ekimubura.

¹²Obwomeezi bwe bwona, asemeza iba, tamukora kabi.

¹³Aikara naaserra ebyoya by'entaama n'obugoigo, kandi akora emirimo n'omutima ogw'engonzi.

¹⁴Asisana nk'emeeri ez'abasuubuzi, ebyokulya bye abiiha hara.

¹⁵Aimuka emamba etakasazire, ateekaniriza abantu be ebyokulya, ategeka n'emirimo, abazaana be ei baraakora.

¹⁶Ateekerezaaho omusiri, kandi agugura; sente ezi yaihire omu mulimo ogu yakozire, abyara orugonjo rw'emizabbibbu.

¹⁷Akora atarukwebarra, n'amaani n'obwekambi.

¹⁸Amanya omulimo ogu arukukora, nkooku guli gw'omuhendo, kandi akora okwiza obwire, ekiro, etaara ye teraara.

¹⁹Akwata akati, ayongosa orugoye rwe rwonyini.

²⁰Agabira abanaku, kandi abaseege abanjururra engaro.

²¹Tatunturra eka ye habw'obutiti, habwokuba, abantu ab'omuka ye, boona baine ebyokujwara ebirukutagata,

²²Ayekorra wenka ebyokwesweka, engoye ze ziba za bafuta enungi, kandi za kahuukya.

²³Iba murangwibara nuwe omu ha bantu abeebembezi.

²⁴Akora ebyokujwara ebya bafuta, abiguza abandi; emyeko agiguza abasuubuzi.

²⁵Muntu w'amaani kandi w'ekitiinisa, ebyomumaiso, tibimutiinisa.

²⁶Abaza ebintu eby'amagezi, kandi ayegesa eby'embabazi.

²⁷Butoosa, atalibana kutungira abantu be ebi barukwetaaga, kandi talya eby'atakoliire.

²⁸Abaana be, bamweta munyamugisa, iba, kandi amuhaisaniza naagamba ati.

²⁹“Abakazi baingi, bakora ebirungi ebirukuhaisanizibwa, baitu abo boona,” niiwe orukubakirra kimu.

³⁰Irungi erya ha maiso, libihabiiha kwonka, n'obunyamibwa, tibugira mugaso, baitu omukazi anyakutiina MUKAMA, nuwe ogu asemeriire kuhaisanizibwa.

³¹Omuhe omugabo habw'ebi byona eby'akora, kandi ebikorwa bye, bimuleetere okuhaisanizibwaga omu malembo.