Read Runyoro - rutooro Nfu 4 Bible Online

Nfu 4 - Runyoro - rutooro bible

Nfu 4

¹Baana bange nimbateererra, muhurrege baisiinywe, mutegege amatu, nukwo mutuunge amagezi;

²habwokuba nimbaragira ebiragiro ebirungi, mutalinaga ebi ndukubeegesa.

³Obu nkaba ndi mwana, ndi hamu, na isenyowe, ninyoroba, kandi arukugonzebwa omu wenka omumaiso ga mau,

⁴isenyowe akanyegesa, yangambira ati: “Ogumizeege kimu ebigambo byange; okwatege ebiragiro byange, nubwo olyomeera;

⁵otalyebwa kandi otalinaga ebi nkugambiire. Oyege amagezi; otunge okwetegereza.

⁶Otaliganaga, kandi galikulinda; ogagonzeege, galikwikaza n'obusinge.

⁷Ekintu ekikuru mali eky'osemeriire kukora, nukwo kutunga amagezi, noobu oraatunga ota baitu gira amagezi.

⁸Oganyumizeege muno, na go nukwo gakukuze obw'oligabumbaatira, galikutungisa ekitiinisa.

⁹Galikujweka ha mutwe enkofiira y'ebyakyo nyakusemera, gakujweke ekondo enungi.”

¹⁰Mwana wange, tega okutu ohurre ebigambo byange, obite ha mutima, nubwo olihangaara.

¹¹Nkwegeseze omuhanda ogw'amagezi, nkwebembiire nakurabya omu mpenda ey'amananu.

¹²Obw'oraabaga noorubata, tihaabehoga ekirukukutanga; kandi obw'oraabaga noiruka, tootabaijukege.

¹³Okwatire kimu eby'oyegesiibwe, otalibinaga; obikwatire kimu, habwokuba, nibyo bwomeezi bwawe.

¹⁴Otalikwata omuhanda gw'ababi, kandi otalitoma omuhanda gw'enkozi z'ebibi.

¹⁵Omuhanda ogu, ogwetantalege otaligurabamu, ogurabehoga ogutiire amabega.

¹⁶Abantu ababi tibasobora kugwijagira batakakozire kibi; oturo tubabura okuhika obu bakeesiitaza omuntu.

¹⁷Habwokuba obubi, okunyaga, nibyo byokulya byabo ebi balya, kandi obunyagi nigo amarwa gaabo aga banywa.

¹⁸Omuhanda gw'abahikiriire, gusisana nk'ekyererezi eky'emamba, ekigenda nikyeyongera kwaka, okuhika omusana obugujwa.

¹⁹Omuhanda gw'ababi gusisana omwirima kasira; bagwa, baitu tibarora eki batabaijwire.

²⁰Mwana wange, ta omutima ha bigambo byange, huunda amatu, ohurre enfumo zange.

²¹Ebi, otalibyebwa; oikalege noobiijuka kandi obiikazeege ha mutima.

²²Habwokuba, bwomeezi hali ogu anyakubizoora,

²³kandi mubazi ogunyakutambira omubiri gwe gwona. Olindege kurungi muno omutima gwawe; habwokuba, nugwo nsoro y'obwomeezi.

²⁴Bingira hara orubazo rw'obweremi, kandi ofuuhye orubazo orutali rw'amananu.

²⁵Orolege oterekeriire otaina bugobya, otalikwatwa ensoni okainama.

²⁶Eky'orukwija kukora, obanzeege okiteekanize kurungi, kyona eky'oraakoraga, nubwo kiraahikaga kurungi.

²⁷Otalitagangara okagenda ha rubaju rw'obulyo, rundi ha rw'emoso; oyetantalege ekibi.