Read Runyoro - rutooro Nfu 5 Bible Online

Nfu 5 - Runyoro - rutooro bible

Nfu 5

¹Mwana wange, ta omutima ha magezi gange, tega okutu ohurre okwetegereza kwange;

²nukwo obege mwegendereza, kandi ebigambo byawe, nukwo byoleke nkooku omanyire bingi.

³Habwokuba, eminwa y'omukazi omunyarwanju, noobu eraaba iturruka obwoki, kandi obugambo bwe buheheera kukira amagita,

⁴baitu hanyuma asarra nk'omubiriizi, asaaliza, kandi atoora nk'empirima ey'amoogi abiri.

⁵Ebigere bye bitoma omunsi y'abafu; ayolekiize omuhanda ogutwara Nyabuyonga;

⁶omuhanda ogw'obwomeezi taguroho naayenjeera, kandi eki takimanya.

⁷Hati nu, baana bange mbeesengeriize, muhunde amatu mbagambire, kandi mutalinaga ebigambo ebi ndukubagambira.

⁸Omukazi nk'ogu, mumwetantalege, kandi mutalirra haihi orwigi rw'enju ye;

⁹obu muligyayo, mulyeihaho ekitiinisa kyanyu mukihe abandi, kandi mulifa mukiri bato, mwiitwe abantu abataina mbabazi.

¹⁰Mazimakwo, abanyamahanga nubo balitwara itungo lyanyu, byona ebi mwatalibaniire, biritungwa omuntu ondi.

¹¹Obw'oliba oli haihi kufa, weena ohoire ha magufa, olisinda,

¹²ogambe oti: “Mawe ka nkakora kubi muno, kunoba okwegesibwa, n'okwangira kimu kuhaburwa!

¹³Ntahurre abeegesa bange ebi bangambiraga, kandi ntatege kutu, kuhurra abahabuzi bange ebi baampaburaga.

¹⁴Nkaba ndi haihi kuhwerekererra kimu, omu kitebe ekikaba kyesoroize.”

¹⁵Onywege amaizi ag'omu iziba lyawe wenka, amaizi agarukugera ag'omukambu kaawe wenka.

¹⁶Ensoro zaawe zisemeriire kurarangibwa hoona, obwambu bw'amaizi busemeriire kurarangibwa omu makuute?

¹⁷Amaizi ago, gabege gaawe wenka, gataliba g'abanyamahanga abali na iwe.

¹⁸Iziba lyawe liheebwe omugisa, kandi oyegonzeege n'omukazi ou waswire oli musigazi,

¹⁹omuligirwa nk'empaaraki, nyakusemera nk'enjaza. Obunyamibwa bwe, bukuleeterege okusemererwa obwire bwona, omugonzeege n'omutima gwaawe gwona.

²⁰Baitu kiki iwe, mwana wange, okusikirizibwa omukazi omunyarwanju, noogwa omu kifuba ky'omukazi engobya?

²¹MUKAMA arora byona omuntu eby'akora, aikara amuroleriire hoona h'akagenda.

²²Ebibi by'omuntu omubi, nugwo omutego ogunyakumukwata; emiguha ey'ekibi kye kyonyini niyo emuboha.

²³Afa habw'okuteegesibwa, kandi ahwerekerra, habw'obudoma bwe obuhinguraine.