Read Runyoro - rutooro Nfu 6 Bible Online

Nfu 6 - Runyoro - rutooro bible

Nfu 6

¹Mwana wange, obw'oliba wayemiire omutaahi, obw'oliba oyesimbiire omunyaihanga;

²obw'oliba wayebohere wenka n'akanwa kaawe, obw'oliba wayekwasire n'ebigambo ebi wagambire,

³mwana wange, kinu nikyo okole, nukwo oyejune! Habwokuba oba oli omu busobozi bw'omutaahi ogu; orahuke bwango, ogende omwesengereze.

⁴Otaikiriza kugwijagira otaikiriza kuhungira;

⁵oyejune nk'enjaza oku eyejuna omuhiigi, nk'ekinyonyi oku kyejuna omutegi.

⁶Iwe gaterra, genda orole enkorooto, oyetegereze ebi zikora, na iwe nukwo obe w'amagezi.

⁷Tizigira mwebembezi, tizigira munyoro rundi omulemi,

⁸baitu omu kasumi ak'ekyanda, zihunika ebyokulya byazo, ebi zirirya omu kasumi ak'irumbi.

⁹Nturumuki iwe, oraikara obyamire aho okuhikya di? Oraasisiimuka di?

¹⁰Noikara noogamba oti: “Ka ngwijagireho, ka nzibirizeeho, ka mpinyeho emikono, mpuumuleho

¹¹baitu obw'oliba okyali omu turo obunaku bulikuhikaho nk'omunyagi kandi amaseege galikutaahirra nk'omusaija anyakwina ebyokurwanisa.”

¹²Omuntu engwiizi, omubi, aikara naayenjeera, naacwa amakuru,

¹³aikara naakoimyakoimya, naaraha itaka n'ebigere bye naayoleka n'ekyaara kye,

¹⁴aikara n'obucwangya omu mutima, talekerra kutegeka obubi, aikara naaleeta obutaikirraniza

¹⁵nikyo alihikirwaho bwango omuhito, omu kacu kake kati, weena aliba acekenyukire, atarukusobora kutambirwa.

¹⁶Haroho ebintu mukaaga MUKAMA eby'anoba, ebintu musanju eby'anugira kimu:

¹⁷amaiso ag'emyehembo, orulimi orubiiha ebisuba, emikono enyakuseesa esagama y'abantu abataina musango.

¹⁸Omutima ogwikara nigutegeka kukora obubi, ebigere ebinyakwanguha bwango kuhikya kutwara omu bubi,

¹⁹kaiso omunyabisuba, anyakubaza kinu aroleriire kiri, n'omuntu ogu katabatabura abantu abanyaruganda.

²⁰Mwana wange, okwatege sso eky'akuragira, kandi otalinaga nyoko eky'akwegesa.

²¹Obutoosa, ebigambo byabo oikalege noobiijuka, obiikazeege ha mutima.

²²Obw'oraabaga noogenda orugendo, birakwebemberaga, ekiro obw'oraabaga obyamire biraakulindaga. Kandi obw'oraasisimukaga, birabazaaga na iwe.

²³Habwokuba, ekiragiro niyo etaara, ekigambo ekyegesibwa, nikyo ekyererezi, kandi okuhanwa ha kwegesibwa, nugwo omuhanda ogw'obwomeezi,

²⁴ebi, nibyo birikwihaho omukazi omubi ogu, nibyo birikujuna akalimi akarukuheheera ak'omukazi endaza.

²⁵Otalimuligira ha bw'obunyamibwa bwe, otaliikiriza kukutwaliriza n'amaiso ge ag'orwanju;

²⁶habwokuba, omukazi omunyarwanju, asobora kutwarwa omusaija, amuhe akagaati, baitu omukazi omusiihani, agenderra kwitira kimu omusaija.

²⁷Omuntu asobora kwetwarra omurro ha kifuba ebyokujwara bye bikalema kuhya?

²⁸Rundi, haroho omuntu asobora kurubata amanda agengere ebigere bye bikalema kunyubuka?

²⁹Nukwo kiri ky'akabi muno kiti kusiihana na muk'omusaija, busaho n'omu amukwataho, akalema kufubirwa.

³⁰Omusuma obw'aiba ebyokulya, enjara emuli kubi, abantu tibamugaya?

³¹Kandi kakuba akwaatwa, alehesibwa emirundi musanju, ahayo ebintu byona eby'omunju ye.

³²Omusaija anyakweha obusiihani, tagira magezi; ogu anyakukora eki, ayehwerekereza wenka.

³³Eky'alitunga, nukwo kuhutaazibwa n'okuswazibwa, kandi ekihemu tikirimuhwaho.

³⁴Habwokuba obufuuhi bukwasa iba omukazi ekiniga ekirukwaka nk'omurro, kandi obw'aba naahoora enzigu, taganyira.

³⁵Tasobora kwikiriza kuleherwa, noobu okumuha ebisembo ebingi bita, tibisobora kumumara ekiniga.