Read Runyoro - rutooro Nfu 7 Bible Online

Nfu 7 - Runyoro - rutooro bible

Nfu 7

¹Mwana wange, okwatege ebigambo byange, kandi oijukege ebiragiro byange;

²okwatege ebiragiro byange, nukwo oyomeere olinde enyegesa yange nkooku olinda emboni y'eriiso lyawe;

³ebi obyebohe ha ngaro zaawe, oikalege obihandiikire ha mutima gwawe.

⁴Gambira magezi oti “Niiwe munyanya nyowe” kandi obwetegereza obwetege munywani waawe nfenanfe;

⁵ebi, nibyo birikujuna omukazi omunyarwanju; nibyo birikwihaho omukazi ogu, omuhwa nsoni, anyakubaza ebigambo ebirukuheheera.

⁶Habwokuba, obu nkaba ndi ha idirisa ery'enju yange, nkalinguliriza omu idirisa eri,

⁷narora omu bataina magezi nayetegereza omu basigazi, omusigazi ataina magezi, naahingura,

⁸akwasire oruguudo orunyakuli haihi n'akeekubo akaahikyaga omuruguudo orwatomaga omunju y'omukazi oli.

⁹Omu kairirizi, omu kasweko k'obwire, omu bwire bw'ekiro, kandi omu mwirima.

¹⁰Dora! Omukazi ogu anyakujwaire nka malaaya, anyakwina omutima ogw'obucwangya; yatangirra omusigazi oli.

¹¹Akaba ali mukazi muhakani kandi mwereme, ataikaraga omuka;

¹²hati ali omu ruguudo omu kasumi kandi, dara uwe omu katale, ayesereka, ategeriize ha buli keekubo.

¹³Akagwa omusigazi oli omu kifuba, yamunywegera yamugambira ataina kasoni ati:

¹⁴Kiro kya hati, nubwo mpongere ebihongwa byange, kandi nyina enyama ei nyihire ha byonzira.

¹⁵Nukwo kwija ninkuserra, nyenzire kukuzoora, nyine ekihika kandi nakugwaho!

¹⁶Ekitabu kyange nkicikinyiize kurungi, nakisweka engoye ez'erangi ez'amanyumizo bafuta eya Misiri;

¹⁷mboyeseze kurungi ekitabu kyange n'eseeta emigaju n'ebirukuboya.

¹⁸Koowe, ija twegonze okuhika obwire bukiire; twesemeze, nitwolekangana engonzi.

¹⁹Habwokuba, ibanyowe taroho; akagenda orugendo rwa hara;

²⁰akatwara endyanga ya sente, aligaruka hahingwire wiiki ibiri.

²¹Amusikiriza n'ebigambo bye ebingi kasoonasoona, yamuhambiriza n'orulimi rwe orurukuheheera.

²²Ahonaaho, omusigazi amagezi gamuhwamu, atebeekera, ahondera omukazi, nk'enimi oku egenda omu ibaagiro, nk'ensama oku ekwatwa bwango,

²³okuhika omusogi obu gugicumita ebyenda; nk'ekinyonyi oku kyenaga bwango omu mutego; atarukumanya nkooku arukwija kuhwerekerra.

²⁴Hati nu, baana bange, mbeesengeriize muhunde amatu, muhurre ebi ndukubangambira.

²⁵Omukazi nk'ogu, atalibatwara omutima, mulekege kumukuraatira;

²⁶habwokuba, akahwerekereza abantu baingi, aba yaisire tibasobora kubarwa.

²⁷Enju ye, nugwo omuhanda ogutwara Nyabuyonga, niyo makutu enyakutwara omu bisiika bya warufu.