Read Runyoro - rutooro Nfu 8 Bible Online

Nfu 8 - Runyoro - rutooro bible

Nfu 8

¹Magezi tagamba, kwetegereza tayamirra?

²Ha mitwe y'ensozi ezinyakuli haihi n'emihanda, omu buhanda, nuho ayemerra.

³Haihi n'amalembo ag'omumaiso g'orubuga, haihi n'emiryango, nuho ayamiriirra ati:

⁴“Inywe bantu inywe, ninywe ndukweta, inywe baana b'abantu ninywe ndukwamirra.

⁵Basema inywe, mwege obwegendereza, badoma inywe, mutunge omutima ogw'amagezi.

⁶Muhunde amatu, baitu, ndabaza ebintu ebirungi, kandi ninyija kubagambira ebihikire.

⁷Habwokuba, akanwa kange karabaza amananu; obubi nubwo kafuuhya.

⁸Byona ebi ngamba by'amazima; busaho na kimu eky'ebisuba rundi ekirukuhabisa.

⁹Byona biterekeriire hali ogu arukwetegereza, kandi by'amazima, hali abo abanyakuserra amagezi.

¹⁰Weekomere ebi ndukukuragira, okukira okukomaho efeeza, weekomere amagezi okukira zaabbu enungi muno.

¹¹Habwokuba amagezi gakira amabaale ag'omuhendo, byona eby'osobora kugonza tibisobora kugeerenga.

¹²Nyowe magezi, obwegendereza nubwo nafoire bwikaro bwange ninyowe nzoora okumanya n'obweriinzi.

¹³Okutiina MUKAMA, nukwo kunoba obubi. Emyehembo n'okwenyumiza, omuhanda gw'obubi n'embaza enyakuramaire, mbinoba.

¹⁴Ninyowe mpabura, kandi ninyowe nyina amagezi agarumu obwomeezi, nyina obwetegereza, nyina n'amaani.

¹⁵Ninyowe mpa abakama obusobozi obw'okulema kandi ninyowe mpa abalemi obusobozi obw'okutaho ebiragiro ebihikire;

¹⁶ninyowe mpa abanyoro obusobozi obw'okulema, kandi ninyowe mpa ab'ekitiinisa obusobozi obwokulema ensi.

¹⁷Ngonza abo abanyakungonza, kandi abo abanyakunseerra n'obwekambi, banzoora.

¹⁸Obuguuda n'ekitiinisa, ninyowe mukama wabyo, ninyowe ngira ituungo eritahwaho n'omugisa.

¹⁹Omugabo gwange nigukira ezaabbu erukukirra kimu oburungi, nibikira efeeza erukukirra kimu oburungi.

²⁰Ngendera omu muhanda ogw'obuhikiriire, ndaba omu buhanda obw'obwinganiza,

²¹nintungisa abo abanyakungonza, kandi ninyijuza amaahurro gaabo.

²²MUKAMA akampanga naakyatandika omulimo gwe, ninyowe omu hali ebi ebya ira ebi yabandize kukora.

²³Okuruga kara na kara, nyowe nkaba ndoho, nkabaho okuruga omu kubanza, ensi etakabaireho,

²⁴nyowe nkazaarwa amayanja gatakabaireho, ebyambu ebirukuseesa amaizi amaingi bitakabaireho.

²⁵Nkazaarwa ensozi itakahangirwe, n'obusozi butakabaireho;

²⁶Ruhanga atakahangire ensi n'obwerre atakahangire ecuucu ey'okubanza ey'itaka.

²⁷Obwakaba naataho iguru, nyowe nkaba ndoho, obu yatahoga emitaano y'enyanja, nabwo nkaba ndoho.

²⁸Obwakaba naagumya iguru erya haiguru, obwakaba naagumya ensoro ez'okuzimu,

²⁹obwakaba naayoleka enyanja emitano yayo, amaizi nukwo galeke kuguruka ekiragiro kye, obwakaba naayoleka emisingi y'ensi,

³⁰obu bwona, nkaba mmuli ha rubaju, ndi nk'omwebembezi ha mulimo; buli kiro ninyowe namuleeteraga kusemererwa

³¹obutoosa ninsemerererwa omumaiso ge, ninkyanganukira omunsi ye ey'okwikarwamu, ninsemereza abaana b'abantu.

³²Hati nu, baana bange, muhunde amatu mbagambire; bahiirwa abo, abanyakukora ebi ngonza.

³³Muhurre eki ndukubahabura, nukwo mutunge amagezi, eki muleke kukigirra obugara,

³⁴Muhiirwa omuntu ogu, anyakwikara ategere amatu ahurre eki ndukugamba, anyakwikara ahangire amaiso omu malembo gange, anyakwikara haihi n'emiryango yange.

³⁵Habwokuba, ogu anyakunzoora, aba azoire obwomeezi, kandi MUKAMA amugirra embabazi;

³⁶baitu ogu anyakunsubwa, ayesaaliza wenka, boona abanyakunnoba, bagonza orufu.”