Read Runyoro - rutooro Nfu 9 Bible Online

Nfu 9 - Runyoro - rutooro bible

Nfu 9

¹Magezi akeeyombekera enju ye, yagihangiza n'enyomyo zaago musanju.

²Aisire ebisoro bye ajwanganiize eviini ye, gatabwiremu ebirukuboya, kandi gateekaniize emeeza yago.

³Atumire abazaana be, kweta abantu ab'omu biikaro ebikuru eby'orubuga,

⁴“Omusema weena aije hanu!” Omudoma amugambira ati:

⁵“Mwije mulyeho ebyokulya byange, munyweho amarwa aga mbatabuliire.

⁶Mufuuhye obudoma nukwo mwomeere, kandi mukwate omuhanda ogw'obwetegereza.”

⁷Anyakuhana omuntu ow'emigayo, ayejumisa wenka, kandi ogu anyakujunaana omuntu omubi, ayenaga omukabi.

⁸Otalihana omuntu ow'emigayo, obw'olimuhana alikunoba; ohabulege omuntu ow'amagezi, ogu alikugonza.

⁹Ohabulege omuntu ow'amagezi, ogu alyeyongera kuba w'amagezi okukiraho; oyegeseege omuhikiriire, alyeyongera amagezi.

¹⁰Okutiina MUKAMA, niyo entandiko y'amagezi kandi okumanya Ogu Arukwera, nukwo okwetegereza.

¹¹Habwokuba, ninyowe ndikanyisa ebiro byawe, ninyowe ndyongera emyaka ha bwomeezi bwaawe.

¹²Kakuba oba w'amagezi, amagezi gaawe galigasira iwe, obw'oraaba oli w'emigayo, olirora ekirikurugiramu.

¹³Omukazi omudoma, aikara naatoka, aba munyarwanju, kandi muhwansoni,

¹⁴aikara ha mulyango gw'enju ye, aikara aikaliire omu biikaro ebirukukira obukuru omu rubuga,

¹⁵naayetegereza abo, abarukuhingura, abataire omutima ha mirimo yabo.

¹⁶Naagamba ati: “Omusema wena aije hanu!” Kandi omudoma amugambira ati:

¹⁷“Amaizi agaibirwe, nugo gakira kutamba iroho, n'omugaati ogwibirwe, nugwo gukira kunura”.

¹⁸Baitu omusaija tamanya, oku nkooku haliyo kagingo, tayetegereza abagenyi b'omukazi ogu, nkooku bagenda omu bihanga bya Nyabuyonga.