Read Runyoro - rutooro Mug 1 Bible Online

Mug 1 - Runyoro - rutooro bible

Mug 1

¹Binu nibyo ebigambo by'omugambizi mutabani wa Daudi, omukama ow'akaba ali Yerusaalemu.

²Omugambizi naagamba ati, Bya busa, byona bya busa! Byona tibiina mugaso.

³Byona omuntu ebi atalibanira hansi y'izooba, agobamu ki?

⁴Harugaho akasumi, haija akasumi akandi, baitu ensi, yo, ikaraho ebiro byona.

⁵Izooba liimuka, kandi ligwa, ligaruka bwango nambere liimuka.

⁶Omuyaga guteera, nigutwara ha bukiizi bw'obulyo, gwehinguliriza guhika ha bukiizi bw'emoso; gugenda nigwehinguliriza, butoosa omu rugendo rwagwo.

⁷Ebyambu byona, biseesa omu nyanja, baitu enyanja tiijura; nambere biseesa, nuho bigaruka kuseesa.

⁸Ebintu byona biijura obujwahi; omuntu tamanya kinu eki atagamba ngu eriiso tiriniha kurora, n'okutu tikutamwa kuhurra.

⁹Ekyabaireho, nikyo kiribaho, n'ekyakozirwe, nikyo kirikorwa; hansi y'izooba, busaho kintu kihyaka.

¹⁰Haroho ekintu ekinyakugambwaho ngu “Murole kinu kihyaka”? Eki kikabaho ira, itwe tutakabaireho.

¹¹Ebintu ebyahingwiire tibiijukwa, eby'omumaiso ebitakabaireho n'abo abaliija enyuma tibalibiijuka.

¹²Nyowe omugambizi, nkaba ndi mukama ayalemere Isirairi, omu rubuga Yerusaalemu.

¹³Omutima gwange, nkagumaliza ha kuserra na ha kukaguluriza buli kintu, ekyakozirwe amagezi omunsi ogu nugwo omugugu Ruhanga ogu yahaire abantu okwetweka.

¹⁴Nkeetegereza buli kintu ekyakozirwe hansi y'izooba, mali byona bya busa, kiri nk'okubinga omuyaga.

¹⁵Ekyaramaire, tikisobora kugororwa, kandi ekitaroho, tikisobora kubarwa.

¹⁶Nubwo nagambire nti: “Nkatunga amagezi maingi, okukirra hara, boona ebanyebembiire, abaabandize kulema Yerusaalemu; nyetegeriize bingi, kandi mmanyire bingi.”

¹⁷Kandi omutima gwange nkagumarra ha kumanya amagezi, kumanya iraro n'obudoma. Eki na kyo nkarora nkooku kuli nk'okubinga omuyaga.

¹⁸Habwokuba amagezi amaingi, gazaara obusaalizi, kandi omuntu anyakweyongera amagezi, ayeyongera obujune.