Read Runyoro - rutooro Mug 11 Bible Online

Mug 11 - Runyoro - rutooro bible

Mug 11

¹Omugaati gwawe guhungule ha maizi, habwokuba oliguzoora, hahingwiireho ebiro bingi.

²Gabira abantu musanju, rundi munaana, habwokuba, tomanyire kabi akasobora kugwera ensi.

³Ebicu obu biijura enjura, bigiseesa ha itaka; kandi omuti kakuba gugwa omu Masirimuka rundi omu Matemba nambere gugwa, oku nuho gwikara.

⁴Omuntu anyakwikara aroleriire omuyaga, talisiga; kandi anyakwikaza amaiso ha bicu, taligesa.

⁵Nkooku otamanyire omwoyo oku gutaaha omu magufa, omunda y'omukazi anyakwina enda, nukwo otamanyire omulimo gwa Ruhanga, anyakukora ebintu byona.

⁶Omu bwire bwa nyenkya, osigege embibo yaawe, nukwo oti n'orwebagyo; habwokuba, tomanyire ey'eraamera, enu nandiki eri, rundi zoombi kakuba zimera, kiriba kirungi.

⁷Ekyererezi, kiba kirungi, kandi okurora izooba, kisemereza amaiso.

⁸Habwokuba omuntu kakuba ayomeera emyaka nyingi, ebi byona kirungi abirole; baitu aijuke ebiro eby'omwirima nkooku biriba bingi, byona ebiribaho bya busa.

⁹Iwe musigazi, wegonze okyali muto, wesemereze omu biro eby'obuto bwawe; kora omutima gwawe ebi gurukwenda kandi orole amaiso gawe ebi garukusiima. Baitu habw'ebintu ebi byona, omanyege, Ruhanga nkooku alikucwera omusango.

¹⁰Weyihe ekiniga omu mutima, kandi omubiri gwawe ogucweho obusaalizi; habwokuba obusigazi n'omururu gw'ebintu, tibiina mugaso.