Read Runyoro - rutooro Mug 12 Bible Online

Mug 12 - Runyoro - rutooro bible

Mug 12

¹Kandi oijukege Omuhangi waawe obusigazi bwawe, ebiro ebibi bitakahikire, n'emyaka ei oligambiramu oti, “Ebi timbiroho” etakahikire haihi, oijukege, Omuhangi waawe;

²izooba, ekyererezi okwezi, n'enyunyuuzi bitakaswekerwe omwirima; ebicu, enjura emazire kukya bitakagarukire,

³ha kiro abalinzi b'enju eki balikankaniraho, abasaija ab'amaani eki balyeegemeraho, abarukusa habwokuba bake, eki balirekeraho, abo abarukurorra omu madirisa obu balihimbaara,

⁴enyigi eza ha ruguudo obu zirikingwa; orubengo obu ruligamba mpora, omuntu obu alisisiimurwa iraka ly'ekinyonyi, kandi abaisiki abazini boona bakabundaazibwa;

⁵balitiina ekiriba haiguru, kandi omu mihanda halibamu ebirukukanga; omuti omulozi gulyakya, enseenene ziriiguta, okwegomba kulihwaho, habwokuba omuntu alitaaha omuka ye ey'obusinge n'obusinge.

⁶Obu abalizi baliba bali omu makuute nibarabanganamu. Omuguha ogw'efeeza gutakacwekere, ekibindi eky'efeeza kitakaatikire, ensoha etakaatikiire ha ngezi, enyamuziga etakacwekiire ha iziba, abalinzi balyehinguliriza enguudo,

⁷ecuucu erigaruka omu itaka nkooku ekaba eri, kandi omwoyo guligaruka hali Ruhanga ayagugabire.

⁸Omugambizi naagamba ati, bya busa kwonka, byona busamu mugaso.

⁹Okwihaho eky'okuba munyamagezi omwegesa obu yamazire kulenga, kwega n'okusemeza n'obwegendereza bwingi enfumo nyingi, kandi akeegesa abantu amagezi ge.

¹⁰Akalengaho okuzoora ebigambo ebinyakusemereza, yahandiika kurungi ebigambo eby'amazima.

¹¹Ebigambo by'abanyamagezi, bisisana ebisobyo kandi ebigambo ebisorooziibwe ebinyakugambirwe omuliisa omu, bisisana emisumaali enyakutiirwe yaguma.

¹²Mwana wange, oyerinde ekintu kyona ekitali ekimu hali binu. Okuhandiika ebitabu bingi tikugira hookugarukira kandi kwega muno, kujwahya omubiri.

¹³Okucwera ha gufu; ebigambo byona okubihurra otiinege Ruhanga, kandi okwatege Ebiragiro bye habwokuba, ogu nugwo mulimo gw'omuntu gwona.

¹⁴Habwokuba, ebikorwa byona n'ebintu eby'ensita byona, bibe birungi rundi bibe bibi, Ruhanga alibicwera omusango.