Read Runyoro - rutooro Mug 2 Bible Online

Mug 2 - Runyoro - rutooro bible

Mug 2

¹Nkateekereza nti: “Hati ka ndengese n'ebyokwesemeza; ka nyegonze.” Eki nakyo nkarora nkooku kitaina mugaso.

²Nkeetegereza, enseko nkooku kiri kintu ky'obudoma, kandi okwesemeza, nkooku kutakuleetera karungi.

³Nkaseerra n'omutima gwange gwona, nkooku ndaasemereza omubiri gwange, ninywa amaarwa, omutima gwange, nigumpa amagezi nkooku ndaahikaho obudoma, okuhika obu ndisobora kurora ekintu ekirungi, abantu, omu biro ebike eby'obwomeezi bwabo obw'omunsi, eki basemeriire kukora.

⁴Nkankora emirimo ey'ekitiinisa; nkombeka amaju, kandi nayebyarra emisiri ey'emizabbibbu.

⁵Nkeerimira emisiri n'ebibanja, engonjo nabyaramu emiti ey'ebijuma ebya buli mulingo.

⁶Nkeerimira amaziba, agaarugwamuga amaizi ag'okwitirra ekibira ky'emiti eyerukukura.

⁷Nkeegurra abairu n'abazaana, abairu abamu baazarwa omunju yange; kandi nkatunga amahyo maingi, ag'ente n'amagana gembuzi, okukira boona abaambandize Yerusaalemu.

⁸Kandi nkeekukira efeeza n'ezaabbu, obuguuda obw'abakama n'obw'amasaza; nayetungira abazini, abasaija n'abakazi nataho n'abaranga, eki, omusaija nikyo agonza.

⁹Nukwo nafookere w'ekitiinisa nti, nakirra kimu boona, abambandize kwikara Yerusaalemu; kandi nkaikara nkyaina amagezi gange.

¹⁰Kyona amaiso gange eki gaakagonzaaga kurora, ntankigaime. Omutima gwange ntagwime kusemererwa, habwokuba omulimo gwange gwona nugwo gwasemerezaaga omutima gwange, kandi eki, niyo mpeera ei nagutungamuga.

¹¹Hanyuma nkateekereza byona ebi nkaba nkozire, amaani goona, aga nataireho okubikora nkarora byona nkooku bitaina mugaso kandi kuli nk'okubinga omuyaga, mali busaho kintu eky'amagoba omunsi.

¹²Nukwo kugaruka ha kuteekereza amagezi, iraro n'obudoma; ekyokurorraho omugwetwa w'omukama asobora kukora ki? Rundi eki kyonka ekyakozirwe ira.

¹³Nubwo nayetegeriize nti, amagezi kintu kirungi, okukira obudoma, nk'ekyererezi oku kiba kirungi kukira omwirima.

¹⁴Omuntu omunyamagezi, arora omumaiso nambere arukugenda, baitu omudoma agendera omu mwirima; baitu nkeetegereza, boona nkooku bahikwaho ekintu kimu.

¹⁵Nubwo nateekeriize nti, “Ekirihikaho omudoma, na nyowe nikyo kirimpikaho. Kandi obu, amagezi gange ga mugaso ki?” Eki na kyo nkarora kitaina mugaso.

¹⁶Habwokuba omugezi n'omudoma, tibaliikara nibaijukwa, omu biro eby'omumaiso boombi balyeba. Kalimagezi alifa nk'omudoma!

¹⁷Eki nikyo kyandeetiire kunoba obwomeezi, habwokuba, ekinyakukorwa omunsi nikintama, ningira byona tibiina mugaso, kandi kuli nk'okubinga omuyaga.

¹⁸Byona ebi nakozire omunsi obu narozire nkooku ndi w'okubirekera omugwetwa, nabinoba.

¹⁹N'oha amanyire nkooku aliba muntu w'amagezi rundi mudoma? Baitu byona ebi nahendekiire omunsi, kandi ebi nataireho amagezi gange, nuwe aliba mukama wabyo. Eki na kyo, tikiina mugaso.

²⁰Nukwo kumagamaga, byona ebi natalibaniire omunsi, byanterebura,

²¹habwokuba obundi n'obundi, omuntu anyakutalibana n'amagezi, n'okumanya, n'okukora kurungi, byona abirekera ondi ow'atarabitalibaniire. Eki na kyo, tikiina mugaso, kandi ky'akabi kakooto.

²²Byona omuntu ebi atalibanira kandi ebi ayekambira omunsi, atungamu ki?

²³Obwomeezi bwe bwona, buba busaalizi, kandi omulimo gwe, bujune; noobwakubaire omu bwire bw'ekiro, omutima gwe tiguteekaana. Eki nakyo tikiina mugaso.

²⁴Busaho kintu ekirukukira oburungi, omuntu eki asobora kutunga, nk'okulya, okunywa, n'okwegondeza omu mulimo gwe. Eki nakyo, nkarora nkooku kiruga hali Ruhanga;

²⁵habwokuba ow'atali hamu na Uwe, n'oha asobora kulya rundi n'oha asobora kusemererwa?

²⁶Habwokuba Ruhanga, amagezi, okumanya n'okusemererwa, abiha omuntu anyakumusemereza; baitu omusiisi, amuha omulimo ogw'okusoroza n'okutuuma, ebi okuha ondi anyakusemereza Ruhanga. Eki nakyo tikiina mugaso, kandi kubinga omuyaga.