Read Runyoro - rutooro Mug 3 Bible Online

Mug 3 - Runyoro - rutooro bible

Mug 3

¹Omunsi munu, buli kintu kigira akasumi kaakyo, kandi buli kigambo kigira akasumi kaakyo.

²Habaho akasumi ak'okuzaarwa, n'akasumi ak'okufa; akasumi ak'okubyaara, n'akasumi ak'okwiiha ekyabyairwe;

³akasumi ak'okwita, n'akasumi ak'okukiza; akasumi ak'okuseesa, n'akasumi ak'okwombeka,

⁴akasumi ak'okurra, n'akasumi ak'okuseka; akasumi ak'okuba omu kiinamirro, n'akasumi ak'okucekeca;

⁵akasumi ak'okuhungurramu amabaale, n'akasumi ak'okugasoroolezaamu; akasumi ak'okugwa omu kifuba, n'ak'okutagwa omu kifuba;

⁶akasumi ak'okuserra, n'akasumi ak'okubulirirwa, akasumi ak'okwahura, n'akasumi ak'okuhungura;

⁷akasumi ak'okutemura, n'akasumi ak'okubaziira; akasumi ak'okuculeera n'akasumi ak'okubaza;

⁸akasumi ak'okugonza, n'akasumi ak'okunoba; akasumi ak'obulemu, n'akasumi ak'obusinge.

⁹Omuntu, byona ebi atalibanira abiihamu magoba ki?

¹⁰Nkeetegereza omulimo Ruhanga ogu yahaire abantu kukora.

¹¹Buli kintu akakisemereza omu kasumi kaakyo; kandi akata omu mutima gw'omuntu kuteekerezaaga ebi ebitahwaho, baitu eki, aina omulingo ogu yakikoziremu, omuntu nukwo kutasobora kumanya, Ruhanga ebi yakozire, okurugirra ha kubanza, okuhika ha kumaliirra.

¹²Mmanyire nkooku hataroho kintu ekibakirra oburungi, nk'okusemererwa n'okwegonza, bakyali boomeezi,

¹³kandi nkooku kiba kisembo kya Ruhanga, eki aha omuntu, buli muntu nukwo akasobora kulya n'okunywa, n'okwesiimira omu mirimo ye yoona.

¹⁴Mmanyire, kyona kyona Ruhanga eki akora, nkooku kiikaraho ebiro byona; busaho ekisobora kwongerwaho, kandi busaho ekisobora kwihwaho.

¹⁵Eki ekinyakuroho, kikabaho ira; eki ekirukwija kubaho, kikabaho ira; kandi Ruhanga aserra ekyahingwireho.

¹⁶Ekindi, nkarora omunsi, nambere haakubaire obwinganiza, kandi nuho haba okuhenderra, nambere hali oburungi, naho habaho obubi.

¹⁷Nkateekereza nti, Ruhanga nuwe alicweramu omurungi n'omubi, habwokuba, nuwe yataireho akasumi, aka buli kigambo, n'aka buli mulimo.

¹⁸Ha bantu, nkateekereza nti, Ruhanga naabalengesa, abamanyise nkooku batali kintu kindi, baitu bisoro.

¹⁹Habwokuba, ekinyakuhikaho abantu, n'ekinyakuhikaho ebisoro, nikyo kimu. Omuntu nkooku afa; n'ekisoro nukwo kifa. Byona biina orwoya rumu, omuntu takira ebisoro, habwokuba, byona bintu ebitaina mugaso.

²⁰Byona bigenda omu kiikaro kimu; byona bikaruga omu cuucu. Kandi byona birigaruka omu cuucu.

²¹N'oha anyakumanyire omwoyo gw'omuntu obuguraba gutemba haiguru, kandi omwoyo ogw'ekisoro obuguraba gusirimuka hansi omwitaka?

²²Habweki, nkeetegereza nkooku hataroho ekintu ekirungi, okukira nk'eki. Omuntu okwesiimira omu mulimo gwe. Habwokuba ogu, nugwo omugabo gwe; n'oha ow'alisobora kumuleeta kurora ekiribaho, amazire kurugaho?