Read Runyoro - rutooro Mug 7 Bible Online

Mug 7 - Runyoro - rutooro bible

Mug 7

¹Ibara, erirungi nirikira amagita ag'omuhendo; kandi ekiro eky'okufa, kikira eky'okuzaarwa.

²Okugenda omunju nambere barukurra, kirungi okukira kugenda omunju nambere hali obugenyi; habwokuba okufa niyo empero ey'abantu boona, kandi aboomeezi eki baikalege nibakiijuka.

³Obusaalizi buba burungi okukira enseko, habwokuba, obujune obwa ha maiso, busemereza omutima.

⁴Omutima gw'omuntu ow'amagezi, gwikara omunju nambere hali kurra; baitu omutima gw'abadoma, gwikara omunju nambere hali enseko.

⁵Kirungi omuntu kwikiriza kuhanwa abanyamagezi, okukira omuntu kuhurra ekizina ky'abadoma.

⁶Habwokuba enseko z'abadoma zisisana amahwa aganyakuhuulikira omu kyoto eki na kyo tikiina mugaso.

⁷Mazimakwo, okusaaliza omuntu, kuteera abanyamagezi obudoma, kandi enguzi, esiisa ebitekerezo.

⁸Empero y'ekintu, eba nungi kukira entandiko; kandi okugumiisiriza, kuba kurungi kukira okwekuza.

⁹Olekege kubiihirwa bwango, habwokuba, abadoma nubo baikaza ekiniga ha mutima.

¹⁰Olekege kwekaguza oti, “Habwaki omu biro ebya ira, ebintu byali biri birungi, okukira ebya hati?” Eki, tikiri kikaguzo ky'amagezi.

¹¹Amagezi kintu kirungi, kigasira abo abanyakujwerwa omusana.

¹²Habwokuba, sente nkooku zirinda omuntu, n'amagezi nukwo gamulinda: kandi ekirungi ekiruga omu magezi, nikyo kinu: anyakwina amagezi, arora nkooku garukumulinda kurungi.

¹³Oteekereze Ruhanga ebi yakozire; eki yaramaize, n'oha asobora kukigorra?

¹⁴Omu kasumi ak'obusinge, semererwa, kandi omu kasumi ak'omuhito teekereza oti; Ruhanga nuwe yaleesire obusinge kandi nuwe yaleesire omuhito. Omuntu nukwo aleme kumanya, ekyamutegekiirwe.

¹⁵Omu bwomeezi bwange bunu obw'akacu kake, nkeetegerezaamu bingi muno: Omuntu omurungi, omuburungi bwe noobu aba naakora ebirungi bita, nuwe afa, kandi omuntu atatiina Ruhanga, ayomeera kukiraho.

¹⁶Oleke kuhinguraniza kuba muhikiriire, kandi oleke kweyeta munyamagezi anyakuhinguraine; habwaki nooyenda kufa?

¹⁷Oleke kuba mubi kutamu ensaagi, kandi oleke kuba mudoma; nooyendera ki kufa, akasumi kaawe katakahikire?

¹⁸Ekirukukira oburungi, nukwo kugumya ekimu, baitu ekindi nakyo kutakireka, habwokuba, omuntu anyakutiina Ruhanga, ebi byombi alibihikiriza.

¹⁹Amagezi gaha omunyamagezi amaani, okukira ag'abalemi ikumi abanyakuli omu rubuga.

²⁰Mazimakwo, omunsi munu tiharumu muntu omurungi, ataina kamogo.

²¹Olekege kuta omutima ha bintu byona, abantu ebi bagamba, otaliikara kuhurra omuheereza waawe naakukondereza;

²²na iwe wenka noomanya, nkooku wakonderiize abantu abandi emirundi nyingi.

²³Ebi byona nkabyetegereza n'amagezi; nukwo kucwamu nti, “ndaabaga w'amagezi”; baitu eki kikandema.

²⁴Ebi byona, nkabirengesa n'amagezi nagamba nti, ndiba w'amagezi; baitu amagezi ntagahikeho. Tinsobora kugakenga; kintu ekihamire, kihamire muno, n'oha asobora kukyetegereza?

²⁵Omutima gwange, nkagumarra ha kumanya kwekebiija, kuserra amagezi n'omuhendo gw'ebintu, na ha kumanya obubi bw'obugwagwa, n'obudoma, niryo iraro.

²⁶Kandi eki naboine ekisaaliire kukira orufu, nuwe omukazi; omutima gwe, mitego kandi butimba kandi emikono ye mpiingo, omuntu anyakusemereza Ruhanga, ayetantara omukazi, baitu omusiisi ogu, aliba munyankomo we.

²⁷Omugambizi naagamba ati, obu nkaba ninyongera ekintu ekimu ha kindi, nukwo nzoole omuhendo kinu nikyo nazoire,

²⁸eki naikaraga ninseruliriza ntakizoole. Omu basaija rukumi, nkasangamu omusaija omu, baitu omukazi omuli abo boona, ntasangemu n'omu.

²⁹Kimu kyonka nikyo nazoire, Ruhanga akahanga omuntu aterekeriire, ebintu ebigumire kandi ebitarukwetegerezibwa, omuntu akabyeereetera wenka.