Read Runyoro - rutooro Mug 8 Bible Online

Mug 8 - Runyoro - rutooro bible

Mug 8

¹N'oha anyakusisana nk'omuntu omunyamagezi? Kandi n'oha anyakumanyire kusoborra amakuru g'ebintu? Amagezi g'omuntu, gamuleetera okwangasana ha maiso, kandi gamumaraho engonya.

²Okwatege ekiragiro ky'omukama kandi habw'endahiro yaawe ey'ekitiinisa, olekege kwekanga;

³ekintu obu kiraabaga kitali kirungi omurugege omumaiso, otalibandaara, habwokuba akora kyona eki akagonza.

⁴Habwokuba, ekigambo ky'omukama ky'obusobozi bwingi muno, kandi n'oha ow'asobora kumukaguza ati “N'okora ki?”

⁵Omuntu anyakukwata ekiragiro, talihikwaho kabi, kandi omutima ogw'omuntu ow'amagezi gumanya akasumi n'omuhanda.

⁶Habwokuba emihanda ya Ruhanga omuntu tasobora kugimanya omuhito gw'omuntu noobu guraaba gumulemeera, buli kintu, kigira akasumi kaakyo n'omuhanda.

⁷Omuntu tamanya ekirukwija kubaho. N'oha ow'alimugambira nkooku kiribaho?

⁸Omuntu tasobora kwangira obwomeezi, kandi ekiro ky'okufa, takiinaho busobozi, tikisoboka, kuraga kuruga omu bulemu obu, kandi abo abaayehaire obubi, obubi tibulibajuna.

⁹Obu namaliire omutima gwange ha bintu byona ebinyakukorwa omunsi, omuntu obu aba naalemesa ireme omuntu mutaahi we amusaalize, nubwo nayetegeriize ebi byona.

¹⁰Hanyuma, nkarora ababi bamazire kuziikwa, baataahaga nibaturuka omu kiikaro ekirukwera, kandi baahaisanizibwaga omu rubuga oru baakorramuga ebintu nk'ebi.

¹¹Habwokuba, omusango ogw'ekikorwa ekibi, tigucwiibwa bwango, omutima gw'abantu, gukahwera ha kukora ebibi

¹²Omusiisi, noobu asiisa emirundi kikumi, buli kiro, kandi akahangaara, baitu mmanyire abo abanyakutiina Ruhanga nkooku baliba kurungi, habwokuba bamutamu ekitiinisa;

¹³baitu ababi tibalitunga businge, obwomeezi bwabo nibusisana ekiituuru, kandi balifa bakiri bato, habwokuba, tibatiina Ruhanga.

¹⁴Baitu, haroho ekitaina mugaso ekinyakurorwa omunsi; abantu abarungi bakolerwa ebintu ebinyakusemeriire ababi; kandi ababi, bakolerwa ebintu ebinyakusemeriire abarungi. Eki nakyo, ningamba nti, tikiina mugaso.

¹⁵Habweki, ninsiima okwegonza, habwokuba, omuntu omunsi, tainamu kintu kirungi na kimu, okwihaho okulya, okunywa, n'okwegonza, ebi byonka omu biro byona eby'obwomeezi bwe, Ruhanga obu yamuhaire omunsi nibyo araihaga omu mulimo gwe.

¹⁶Nkooku nataireho muno omutima ha kwega, nkeetegereza ekintu ekinyakubaho omunsi munu. Mazimakwo nyamusana n'ekiro amaiso g'omuntu tigahuumura ebiro byona;

¹⁷hanyuma nkarora omulimo gwa Ruhanga gwona namanya omuntu nkooku atasobora kwetegereza omulimo ogunyakukorwa omunsi. Noobu araatalibana akaserra ata, eki talikyetegereza; omuntu omunyamagezi noobu araagamba ngu amanyire, eki tasobora kukimanya.