Read Runyoro - rutooro Mug 9 Bible Online

Mug 9 - Runyoro - rutooro bible

Mug 9

¹Ebi byona, nkabywecumiitiriza, byona nabyekebiija, abantu abarungi n'abamagezi, hamu n'ebikorwa byabo, nkooku biba omu mukono gwa Ruhanga; noobu ziraaba ziri ngonzi rundi nobi, omuntu tamanyire. Ebi byona, nibibazookera nk'ebitaina mugaso,

²habwokuba, boona nibahikwaho ekintu kimu, omuhikiriire n'atagonza Ruhanga, omubi omurungi, arukwera n'atarukwera, anyakutamba ebyonzira n'atatamba. Omuntu omurungi nkooku aba, n'omusiisi nukwo aba; kandi ogu anyakurahira asisana ogu anyakwetantara endahiro.

³Ako nuko akabi, akanyakusangwa omu bintu byona ebinyakukorwa omunsi, ekintu kimu, nukwo kuhikaho boona; kandi emitima y'abantu, nukwo kwijura obubi, emitima yabo nukwo kubamu iraro bakyali boomeezi, ebi obu bimara kubaho, bafa.

⁴Baitu omuntu anyakuteeranizibwa n'aboomeezi boona, tahwa masiko, habwokuba, embwa enyomeezi, ekira entale efiire.

⁵Habwokuba, aboomeezi bamanyire nkooku balifa, baitu abafu tibaina eki barukumanya, kandi tibaligaruka kutunga empeera; tibarukwijukwa.

⁶Engonzi zaabo, enobi n'ihali, bikahwerekerra ira, omu bintu byona ebinyakukorwa omunsi, tibaligaruka kutungamu omugabo ebiro byona.

⁷Genda oyeriire ebyokulya byawe oina omuhimbo, kandi oyenyweere eviini yaawe oina omutima ogusemeriirwe.

⁸Obutoosa ojwalege ebyokujwara ebirukwera; otalireka kwesiiga amagita omu mutwe.

⁹Ebiro byona eby'obwomeezi bwawe obutaine mugaso, Ruhanga ebi yakuhaire omunsi, oyegonzeege na mukazi waawe ou ogonza, habwokuba, ogu nugwo mugabo gwawe omu bwomeezi, n'omu mulimo gwawe ogu okora omunsi.

¹⁰Kyona eki oraatahoga engaro, okikolege n'amaani gaawe goona; habwokuba, Nyabuyonga nambere oligenda, tihabayo kukora, tihabayo kuteekereza, kandi tihabayo magezi n'okumanya.

¹¹Ekindi eki narozire omunsi, abayakwiruka muno, tinubo basinga enziriga, abaamani, tinubo basingura obulemu, ebyokulya tibitungwa enyetegereza, itungo tiritungwa banyamagezi, kandi embabazi tiigirirwa abantu abafundi; akasumi n'omugisa boona bibahikaho.

¹²Habwokuba, omuntu tamanyire kasumi ke. Encu nkooku ekwatirwa omu katimba ak'etalengeriire, nk'enyonyi ezinyakukwatirwa omu mutego, omuntu na uwe, nukwo ahikwaho akabi, akamugwaho bwango atakamanyire.

¹³Kandi ekindi, omunsi munu, nkaroramu ekyokurorraho eky'amagezi kandi nkamanya nkooku kiri kikuru.

¹⁴Hakaba haroho orubuga, rurumu abantu bake; hakaija omukama ow'ekitiinisa kururwanisa n'okurugota, yatuuma haihi narwo entuumo z'itaka.

¹⁵Baitu omu rubuga oru, hakaba harumu omusaija omunaku ow'magezi, omusaija ogu habw'amagezi ge, yajuna orubuga oru. Baitu hatabeho muntu n'omu ayaijukire omuntu omunaku ogu.

¹⁶Amagezi g'omusaija omunaku ogu, noobu garaaba gaagayirwe, kandi ebigambo bye noobu biraaba bitaratairweho mutima, baitu nyowe ningamba nti, amagezi gakira amaani.

¹⁷Ebigambo eby'abantu abanyamagezi, ebinyakuhulirwa mporampora bikira etoko y'omulemi, enyakuhulirwa abadoma.

¹⁸Amagezi, gakira ebintu eby'okurwanisa obulemu, baitu omusiisi omu, ahwerekereza ebirungi bingi.