Read Runyoro - rutooro Kiz 1 Bible Online

Kiz 1 - Runyoro - rutooro bible

Kiz 1

¹Ekizina kya Solomooni, ekirukukirra kimu ebizina byona oburungi.

²Kakuba obaire onnywegiire, n'okunywegera okw'akanwa kawe! Habwokuba, engonzi zaawe nizikira oburungi eviini,

³amagita gaawe ag'oyesiiga, nigaboya kurungi, ibara lyawe, magita aganyakuseesirwe, nikyo abaisiki bakugondeza.

⁴Ontwale, turahuke tugende hamu. Omukama antaahize omu bisiika bye. Tulisemererwa tugire n'omuhimbo omuli iwe; turaanyumizaaga engonzi zaawe kukira eviini; abanyakukugonza, bahikiza kimu kukugonza.

⁵Inywe bahara ba Yerusaalemu, ninyiragura muno, baitu ndi murungi, ndi nk'eheema za Kedara, nk'emikingo ya Solomooni.

⁶Muleke kundolerra habwo'okwiragura, habwokuba, izooba niryo lyanyokeze. Abaana baanyina nyowe, bakankwatirwa ekiniga, bakanfoora mulinzi w'emisiri y'emizabbibbu; baitu orugonjo rwange nyenka, ntarulinde!

⁷Iwe ow'obwomeezi bwange bugonza, ongambire nambere oliisiza igana lyawe, nambere olihuumuliza omu ihangwe; baitu habwaki nsisana nk'omugenzigenzi (anyakweswekeriire ha maiso) hali amagana ga bagenzi baawe?

⁸Iwe anyakukira abakazi boona oburungi, obworaaba otamanyire, hoondereza igana omu kirale, oliisize obwana bwawe bw'embuzi harubaju rw'eheema z'abaliisa.

⁹Iwe omugonzibwa wange, ninkulengesaniza embaraasi omu bigaali bya Faraaho.

¹⁰Isoke ryawe lirungi, ligwire ha matama gaawe, ebikya byawe birumu emifubaso ey'enkwanzi, ez'omuhendo mwingi.

¹¹Turaakukorra omukuufu gw'ezaabbu, hahuunzirweho n'amapeesa g'efeeza.

¹²Omukama obwakaba abyamire hakitabu kye amagita gange ag'obwotere galeeta okukuura kwago.

¹³Enganzi yange, hali nyowe oli nk'akasahu k'emigaju, akali hagati y'amabeere gange.

¹⁴Enganzi yange, nansisanira nk'ekiganda ky'ebyakyo bya henna biri omu misiri y'emizaabbibbu ya Eni-geedi.

¹⁵Omugonzibwa wange dora oli murungi; oli murungi; amaiso gaawe nigasisana nk'amaiba.

¹⁶Boojo enganzi yange kooli murungi, kandi w'okusemeza! Ekitabu kyaitu kyona, ky'erangi yakinyansi.

¹⁷Emirabba y'enju yaitu, y'emikogoto, etandaliwa yayo, ekozirwe n'obubbaaho bwa Siida.