Read Runyoro - rutooro Kiz 2 Bible Online

Kiz 2 - Runyoro - rutooro bible

Kiz 2

¹Nyowe ndi kyakyo kya Rooza ekya Saaroni, iranga erimezire omu byeya.

²Enganzi yange ali omu baisiki nasisana nk'iranga erimezire hagati y'amakerre.

³Enganzi yange omu basigazi, nasisana nk'omuti gw'omucunguuwa, ogumezire omu kibira. Nkaikarra omu kiituuru kye nyijwire omuhimbo mwingi, ekijuma kikannurra obu nakinyuunyireho.

⁴Akandeeta, omu kisiika ky'okuliiramu obugenyi, ebeendera yanyimukiize, zikaba ziri ngonzi.

⁵Mungarremu amaani n'emizabbibbu eyomere, munduhuule n'emicunguwa! Habwokuba, engonzi zindwaize.

⁶Omukono gwe ogw'emoso guli hansi y'omutwe gwange, omukono gwe ogw'obulyo, gumbuumbaatiire!

⁷Inywe abaisiki ba Yerusaalemu, nimbarahiza, habw'empara rundi habw'enjaza ez'omu kisaka, muleke okutabangura rundi okusiisimura engonzi, okuhika obwirakeegondeza zonka.

⁸Dora nimpurra iraka ly'enganzi yange naija! Naagurukira hansozi na ha busozi.

⁹Omugonzibwa wange, naasisana enjaza, rundi empaaraki ento. Omurole ayemeriire enyuma y'ekisiika kyaitu, naalinguza omu madirisa, naahwerereza omu butimba.

¹⁰Enganzi yange nubwo yangambire ati; “Omugonzibwa, omurungi wange, imuka orugeyo;

¹¹dora obutiti, enjura, bihoireho bigenzire.

¹²Ebyakyo bibonekere hansi, haizire akasumi ak'okuzina, omunsi yaitu, nihahulirwa iraka ly'eriiba.

¹³Emitini eyanire ebijuma, n'emizaabbibbu eyakize, byona nibiboya kurungi; omugonzibwa, omurungi wange, imuka orugeyo.

¹⁴Iwe eriiba lyange, anyakwikara omu nyatika z'emyandara, omu butongo bw'omunengo, kandole amaiso gaawe, mpurra iraka lyawe, habwokuba, lirungi na hamaiso gaawe n'osemeza.

¹⁵Habwokuba, emisiri y'emizabbibbu yaitu eyakize, mutukwatire ebboha n'obwana bwazo ebinyakugisiisa.”

¹⁶Omugonzibwa wange, wange, na nyowe, ndiwe, aliisiza igana lye, omu maranga.

¹⁷Okuhika obwire obu bukaira, ebiituuru bikaburaho, enganzi yange, garuka, ofooke nk'enjaza, rundi empaaraki ento, biri ha rusozi rwa Bbesera.