Read Runyoro - rutooro Kiz 3 Bible Online

Kiz 3 - Runyoro - rutooro bible

Kiz 3

¹Ekiro nabyamire hakitabu kyange, nkaserra ogu ow'omutima gwange gwagonzaaga; baitu ataanyetebuke.

²Nubwo nagambire nti “Kanyimuke ndubatarubate omu rubuga, omu nguudo n'omu makuute; nseerre ogu ow'omutima gwange gurukugonza.” Nkamuserra baitu ntamubone.

³Abalinzi b'ekiro, obu bakaba nibagendagenda omu rubuga, bakanyitirana nabakaguza nti: “Mumundoliire ow'omutima gwange gurukugonza?”

⁴Nkaba nakabahinguraho kake, namuzoora ogu, ow'omutima gwange gwagonzaaga. Nubwo namukwasire, tinamulekera, okuhikya obunamutwaire omunju ya Mau, omu kisiika ky'ogu ayanzaire.

⁵Inywe bahara ba Yerusaalemu, nimbarahiza, habw'enjaza eby'omukisaka, muleke okutabangura rundi okusisiimura engonzi, okuhikya obw'irakeegondeza zonka.

⁶Dora, nikyo ekitwarre kya Solomooni! Kyehinguliriziibwe abasaija nkaaga, abarukukirra kimu amaani omu Isirairi,

⁷Omukama Solomooni naija, ahimbiirwe ha kitebe kye abaserikale nkaaga nubo barukumulinda, abaserikale abarukukirrayo kimu oburungi omu Isirairi

⁸boona, basaija baina empirima kandi nibamanya kurwana, buli omu, aina empirima ha nyugunyu ye, naayetegekera kuba habaho kuseesirwa ekiro.

⁹Omukama Solomooni wenka, akeekorra ekitwarre kuruga omu mbaaho za Lebbanoni.

¹⁰Enyomyo z'akyo z'efeeza, enyuma yakyo kikakorwa n'ezaabbu, hokwikarra ky'erangi kahuukya; kikarukwa kurungi abakazi ba Yerusaalemu.

¹¹Inywe bahara ba Siyoni, murugeyo murole Omukama Solomooni, ajwaire ekondo, ei yajwekerwe nyina naagabura, ha kiro omutima gwe, gwatuungiireho omuhimbo.