Read Runyoro - rutooro Kiz 4 Bible Online

Kiz 4 - Runyoro - rutooro bible

Kiz 4

¹Enganzi yange, boojo kooli murungi; mazima kwo oli murungi! Amaiso gaawe nigangasana nk'amaiba nigooleka engonzi, enyuma y'orugoye orwoyeswekeriire ha maiso. Isoke ryawe liri nk'igana ly'embuzi, erirukusirimuka obukonkomoko bwa Giryadi.

²Amaino gaawe, nigasisana nk'igana ly'entaama erisazirwe ebyoya, eryakaruga kwogebwa, zoona zoona izaara ebyana bibiri, busaho n'emu hali zo, efiisize ekyana.

³Eminwa yaawe neesisana nk'akahuuzo (akahuuta) akarukugaajuka; obwobaza, yona eba nungi muno. Amatama gaawe, enyuma y'orugoye oyeswekeriire, nigasisana nk'ekijuma ky'omuti omukomamahanga kyasiibwemu habiri.

⁴Ebikya byaawe, nibisisana nk'akasolya ka Daudi, biine obuseera kandi nibiheheera, bijwaire akakuufu akarukusisana n'engabu z'emanzi rukumi.

⁵Amabeere gaawe gombi, nigasisana ebyana ebirongo by'enjaza bibiri, ebinyakuliira omumaranga.

⁶Okuhika emiyaga y'akairirizi etiire, n'ebiituuru bitakyaliyo, ndaikara ha rusozi rw'emigaju, na hakasozi k'eseeta.

⁷Enganzi yange, weena oli murungi; toina kamogo koona.

⁸Omugole wange, ija tugende hamu kuruga hansozi za Lebbanooni, ija turuge Lebbanooni. Twimukye kuruga ha katwetwe ka Amana n'aka Seniri na Heremoni, nambere haikara amaina g'entale, turuge hansozi z'engo.

⁹Munyaanya nyowe, omugole wange, obu ndukurora ha maiso gaawe, naakakuufu ojwaire omu bikya, ninsanga omutima gwange gwona, ogutwaire.

¹⁰Munyaanya nyowe, kandi omugole wange! Engonzi zaawe nizinkyanganura, nizinulirra kukira eviini, kandi okuboya kw'amagita gaawe, nikukira oburungi okuboya kw'ebibaya byona!

¹¹Omugole wange; eminwa yaawe neenuliirra obwoki, hansi y'orulimi rwawe, haliyo amata n'obwoki; okuboya kw'ebyokujwara byawe, nikusisana nookuboya kwa Lebbanooni.

¹²Omugole wange, kandi munyaanya nyowe, naasisana omusiri gwehinguliriziibwe orukoroba, kandi nk'ensoro y'amaizi enyakuswekeriirwe.

¹³Endokwa zaawe, nizisisana nk'omusiri gw'emiti y'amakomamahanga, nambere hatongoirwe ebijuma, ebirukukira oburungi, obu henna na naadi bitabuziremu.

¹⁴Obu harumu na Safuroni, Kalamusi, Sinamoni, enyamirro eya buli mulingo, emigaju n'ebimera ebindi ebiina okuboya.

¹⁵Niiwe omusiri ogwijwire ensoro z'amaizi, iziba ery'amaizi amarungi, kandi ebisaaru ebigera nibiruga omu nsozi za Lebbanooni.

¹⁶Imuka, iwe muyaga gwa matemba, ija iwe ogwa Masirimuka! Ojugute omu musiri gwange, embeho ogiijuze okuboya. Enganzi yange, leka aije omu musiri gwe, alye ebijuma ebirukukira kunura.