Read Runyoro - rutooro Kiz 6 Bible Online

Kiz 6 - Runyoro - rutooro bible

Kiz 6

¹Iwe omurungi rukira abakazi boona, enganzi yaawe agenzire nkaha? Enganzi yaawe atomere guha, tusobole kumukuseruza?

²Enganzi yange asirimukire omu musiri gwe, omu busiri bw'ebiboya, agenzire kuliisiza igana lye omu misiri, n'okusorooza amaranga.

³Nyowe ndi w'enganzi yange, na uwe wange; aliisiza igana lye omu maranga.

⁴Enganzi yange, oli murungi nka Tiruza, kandi noosemeza nka Yerusaalemu

⁵Amaiso gaawe ogaanyiheho ogaroze handi, habwokuba, nigantalibaniza. Isoke ryawe nirisisana nk'igana ly'embuzi, nizikonkomoka obutentebuko bwa Giryadi.

⁶Amaino gaawe, nigasisana igana ly'entaama, ezaakaruga kwogebwa, buli emu ezaara ibiri ibiri, omuli zo, busaho n'emu efiisize.

⁷Amatama gaawe gali omu kyeswekerro kyawe, nigasisana ebyasi eby'amakomamahanga.

⁸Haroho abago nkaaga, abaranga kinaana, n'abaisiki abatarukubarwa muhendo.

⁹Eriiba lyange, embura kamogo ali omu wenka. Omugonzibwa wa nyina, ataina kamogo hali ogu ayamuzaire. Abaisiki bakamurora, bamweta omunyamugisa; abago n'abaranga, na bo nukwo bagambire, kandi bakamuhaisaniza.

¹⁰“N'oha ogu, obu arukurora akasisana nk'emambo, omurungi nk'omwezi, arukumuliikana nk'izooba, akutiinisa, nk'ihe erinyakwine ebendera?”

¹¹Nkasirimuka omu musiri gw'ebinyobwa, kuroraho ebyakyo by'omukihanga, kurora emizaabbibbu obweraaba neesumika, kurora amakomamahanga, obu garaaba gaakize.

¹²Obunkaba ntakeeteekaniize, ebiteekerezo byange bikanta omu kigaali ha rubaju rw'omulemi wange.

¹³Iwe Omusulaamu, garuka, garuka, garuka, garuka, tukuroleho. Habwaki Omusulaamu omurora nkooku orora amahe abiri, nigacekeca hamu?