Read Runyoro - rutooro Kiz 7 Bible Online

Kiz 7 - Runyoro - rutooro bible

Kiz 7

¹Ebigere byaawe biri omu nkaito kabikasemera, iwe omuligirwa nk'omugo. Ebibero byawe, nibisisana akakuufu akaakozirwe omuntu omwegendereza.

²Omukundi gwawe kibindi ekyekulingiriire, ekitahibwamu eviini etabwire. Enda yaawe eri nk'omutuumo gw'engano, ogw'ehinguliriziibwe amaranga.

³Amabeere gaawe gombi, nigasisana nk'obwana bw'enjaza bubiri, oburongo.

⁴Ebikya byawe, biri nk'akasolya akakozirwe omu masanga. Amaiso gaawe, nigasisana nk'ebitungeezi, ebiri omu rubuga Hesibbooni, haihi n'irembo lya Basirabbimu. Enyindo yaawe, eri nk'akasolya ka Lebbanoni, oruroleriire Damasiko.

⁵Omutwe gwawe, gubandaatukire haiguru nk'orusozi Karumeeri, ebiyondo by'agwo bikwasire nibisisana nk'erangi kahuukya; oburungi bwagwo, nibusobora kukwatira omukama omu bunyagwa.

⁶Omugonzibwa, kookasemera, weena oli w'okusemeza iwe omwisiki kasemeza boona!

⁷Okuraiha kwawe kuli nk'okwomukindo, amabeere gaawe nigasisana ebijuma byagwo.

⁸Nditemba omukindo, noge ebijuma byagwo. Amabeere gaawe nigasisana emigimba y'emizabbibbu. Orwoya rwawe, niruboya nk'emicunguwa,

⁹okunywegera kwawe nikukira eviini erukukirra kimu oburungi, enyakugera n'obusinge neeraba omu minwa n'omumaino.

¹⁰Ndi w'enganzi yange, okwegomba kwe kwona kwikara hali nyowe.

¹¹Enganzi yange, rugayo tuturuke tugende omu bwerre, tugoonyege omu byaro;

¹²katuzinduke omu kabwibwi, tugende omu misiri y'emizabbibbu, turole emizaabbibbu obweraaba erokiire, kandi eyakize, n'emiti y'amakomamahanga, obweraaba eyakize ebyakyo, oku nuho ndikuheera engonzi zange.

¹³Oraaboyerwa okuboya kw'amadodoima, kandi ha miryango haliyo ebijuma byona ebitongoirwemu, ebihyaka n'ebikuru ebinkwahuliireyo, iwe enganzi yange. Enganzi yange, oku oraaboyerwa okuboya kw'amakomamahanga, kandi ebijuma byona ebitongoirwemu ebihyaka n'ebikuru ebinkwahuliire, biri ha nyigi zaitu.