Read Runyoro - rutooro Kiz 8 Bible Online

Kiz 8 - Runyoro - rutooro bible

Kiz 8

¹Bambi, kakuba obaire oli munyaanya nyowe, ayayonkere amabeere ga mau! Obu naakukutangaine aheeru, naakubaire nkunywegiire tihakubaireho n'omu akungayire.

²Naakukwebembiire, nkutaahya omunju ya nyina nyowe, omu kisiika ky'ogu ayanzaire, nambere waakunyegesiize engonzi. Naakubaire nkuhaire eviini enyakutairwemu ebiboya onywa, nkuha ensande enungi, eyarugire omu makomamahanga gange.

³Obu, omukono gwe ogw'emoso gwakubaire gunsagwire kandi omukono gwe ogw'obulyo, gunfumbasire!

⁴Inywe abaisiki ba Yerusaalemu, nimbajuma emikago, muleke kutalibaniza rundi kusisiimura engonzi, kuhikya obwiraakegondeza zonka.

⁵N'oha ogu, arukuruga omwirungu, aigamiire enganzi ye? Nkakusisiimura oli hansi y'omuti gw'emicunguwa. Nambere nyoko akaba narumirwa ebisa, ayakuzaire nambere yarumirwaga.

⁶Onte ha mutima, na ha mukono gwawe nk'emanyikirizo; habwokuba, engonzi ziba zamaani kwingana n'orufu, ihali liba ly'omwaga nk'ekituuro Ekibabu ky'azo kiri nk'ekibabu ky'omurro, nk'endimi, ezirukukirrayo kimu kuba z'amaani.

⁷Amaizi nyamwingi tigasobora kuraaza engonzi zange, noobu hakuba amaizi agasandaire, tigasobora kukumira. Kakuba omusaija alengaho kugura engonzi n'ituungo ery'omunju ye lyona, akubaire naanugwa kwonka.

⁸Twine akaisiki akaanyina itwe, obubeere bwako nibusekerra, tulikakorraki ekiro ky'okukajumbira obu kirihika?

⁹Kakuba abaire alikisiika, twakumwombekiire orukomera rw'efeeza; baitu nkooku ali rwigi, turamwehinguliriza n'embaaho z'emikogoto.

¹⁰Nkaba ndi kisiika, n'amabeere gange gakaba gali nk'eminaara; omumaiso ge, nubwo nabaire nk'omuntu anyakuleeta obusinge.

¹¹Solomooni akaba aine omusiri gw'emizaabbibbu, omu kiikaro ekyetwa Bbaalihamoni; akagusigira abalinzi; habw'ebijuma byagwo, buli muntu akaba naija kusasura ebicweka by'efeeza rukumi.

¹²Orugonjo rwange, rwange nyenka, Iwe Solomooni, ikara n'ebicweka byawe by'efeeza rukumi, n'abalinzi baikale n'ebijuma byabo, bikumi bibiri.

¹³Iwe anyakwikara omungonjo z'emizabbibbu, leka mpurre iraka lyawe noobaza, habwokuba, bataahi bange, balindiriire kuhurra engambo yaawe.

¹⁴Enganzi yange, yanguha oije hali nyowe, obe nk'enjaza rundi akaana k'empara ha rusozi rw'ebiboya.