Read Runyoro - rutooro Is 1 Bible Online

Is 1 - Runyoro - rutooro bible

Is 1

¹Kunu nukwo okwolekwa kwa Isaaya mutabani w'Amozi, okurukukwata ha Yuda na Yerusaalemu, omu busumi obwa Huziya, Yosamu, Ahazi na Hezekiya, abakama ba Yuda.

²Ohurre, iguru, iwe n'ensi otege okutu; habwokuba MUKAMA nuwe iwe agambire ati: “Abaana aba nayoroire kandi aba nakulize, nubo banyemiire.

³Enimi emanya mukama wayo, n'enkaina emanya mukama wayo nambere araara, Isirairi nyowe taamanyire, n'abantu bange tibarukunnyetegereza.”

⁴Haa, iwe ihanga erikora ebibi, inywe abantu abaijwire obubi, oruzaaro rw'enkozi z'ebibi, abaana abakora eby'obugobya! MUKAMA bakamufuruka, bakagaya Ogu Arukwera wa Isirairi, bakaahukanira kimu.

⁵Habwaki mwikara nimwema? Nimwenda kufubirwa okukira nkooku mwafubiirwe? Isirairi, omutwe gwawe gwona, bihuta bisa omutima gwona niguruhirra.

⁶Toina bwomeezi okuruga hamara g'okuguru, okuhika hamutwe, hoona binyubule bihooya, n'ebihuta ebirukujwa esagama; tibikwasirweho, tibisemberwe rundi kuteebwamu amagita.

⁷Ensi yanyu, ekafooka kitongo, embuga zanyu bakazookya n'omurro; abanyamahanga bakahamba ensi yanyu nainywe muroleriire muti.

⁸Omuhara wa Siyoni asigaire nk'akasiisira omu rugonjo rw'emizabbibbu, nk'ekirindiro omu musiri gw'ebihweju, nirusisana nk'orubuga orugosirwe.

⁹MUKAMA ow'amahe kakuba ataratulekiireho abantu abake, twakubaire nka Sodomu, twakusisaine nka Gomora.

¹⁰Inywe abalemi ba Sodomu muhurre MUKAMA ekyarukugamba. Inywe abantu ba Gomora, mutege amatu muhurre Ruhanga waitu eky'arukwegesa!

¹¹MUKAMA naagamba ati: Ebyonzira byanyu ebingi ebi, nyowe mbiroho ki? Nkahongerwa ebihongwa bingi muno eby'empaya entaama n'eby'ebisoro eby'ebisajwa, tindukwenda sagama y'enimi, ey'ebyana by'entaama, rundi ey'empaya emburabuzi.

¹²Obu muba mwizire kukurata n'oha abaragira okurubatarubata omu bikaali byange?

¹³Mutagaruka kundeetera ebihongwa byanyu ebitaina mugaso; tindukwenda bubbani, ebiro bikuru byanyu ebya buli kwezi, Sabbato zanyu, ensorookana zanyu, ebi byona bikasiiswa ebibi byanyu.

¹⁴Ameezi ganyu ag'emboneko, n'ebiro byanyu ebikuru ebyatairweho, tindukubyenda; bikafooka mugugu hali nyowe ogu ntasobora kwetweka.

¹⁵Obu muranyimukizaaga emikono mwina ebimurukunsaba, timbafeehoga; noobu mulinyesengereza muta, tindibaha eki murukusaba habwokuba mukaseesa esagama.

¹⁶Mwoge mwere; mwiheho obubi obw'engeso zanyu omumaiso gange; muleke okukora kubi:

¹⁷mwege okukora ebirungi; mukole kyona eki murukusobora okugendera ha bwinganiza, mukoonyere abarukubonabonesibwa, murwanirre enfuuzi, mutonganirre abafaakati.

¹⁸MUKAMA naagamba ati: “Mwije nu, tuhanuule hamu; ebibi byanyu noobu biraaba bibahindwire, nimunanata ninyija okubogya, mwere nk'orubaale; ebibi byanyu noobu biraaba bibarofuhaize bita, mulyera tiititi nka pamba.

¹⁹Obu muraaba nimworoba kandi nimukora ebimurukuragirwa mulirya ebirungi by'ensi;

²⁰baitu obu muraayanga mukeema, mulihwerekerezibwa ekitara; habwokuba eki, MUKAMA nuwe akigambire.”

²¹Orubuga orukaba ruli rwesigwa, murole nkooku rwafookere rusiihani! Oru, orukaba rurumu obwinganiza n'oburungi, hati nurwo rurukuraaza abaisi.

²²Efeeza yawe efookere byenga, eviini yawe efurungwirwe.

²³Abanyoro baawe beemere kandi bateeraine n'abasuma. Boona nibenda enguzi kandi nibaitanira kuheebwa ebisembo. Tibarukurwanirra nfuuzi kandi tibarukuhurra bafaakati.

²⁴Habweki MUKAMA, MUKAMA ow'amahe, Ogu ow'obusobozi owa Isirairi naagamba ati: “Ndibiihirirwa abanyanzigwa bange, kandi ndihoora enzigu abazigu bange.

²⁵Ninyija kukukwataho, ninyija kukusemeza nk'ekyoma oku kisemezibwa omurro, nukwo nkwihemu obubi bwona.

²⁶Ndikugarurra abacwi b'emisango n'abahi b'amagezi, abarukusisana nk'abokaba oinabo okubanza. Hanyuma, nubwo olyetwa orubuga orurungi, orubuga orwesigwa.”

²⁷Siyoni rulicungurwa n'obwinganiza, kandi n'abo abarurumu abalyehana, balijunwa oburungi.

²⁸Baitu abeemi n'enkozi z'ebibi balihwerekerezibwa hamu kandi n'abo abafuruka MUKAMA balihwerekerezibwa.

²⁹Mulikwatwa ensoni habw'emiti emihomozi mwagonzaaga muno muti; kandi muliswara habw'emisiri ei mwayegomboize.

³⁰Habwokuba, mulisisana omuhomozi oguhotokere ebikoora, mulisisana nk'omusiri ogutaitirirwa maizi,

³¹nkooku ebisunga byokebwa akasasaazi k'omurro, n'abantu ab'obusobozi nukwo balihwerekerezibwa bati ebikorwa byabo ebibi, busaho muntu alibajunira.