Read Runyoro - rutooro Is 10 Bible Online

Is 10 - Runyoro - rutooro bible

Is 10

¹Balikibona abo abanyakutaho ebiragiro ebibi ebitali by'obwinganiza n'abahandiiki abaikara nibahandiika ebintu eby'okubonabonesa abantu,

²abaikara nibahandiika ebintu eby'okutanga abaseege okukolerwa eby'obwinganiza, n'ebyokunyaga abanaku ab'omu bantu bange ebintu byabo, nukwo benyagire abafaakati babonabonese enfuuzi!

³Olikora ki ha kiro eky'okufubirwa obu haliteera ihunga eririruga hara? Obu haliija okuhwerekerra okuliruga hara. Olyebinga oha ow'alikukoonyera, itungo lyawe olirisiga nkaha?

⁴Baliba batakyaina eki basobora kukora okwihaho okwesereka omu banyankomo, rundi kugwa omu mitumbi enyakwisirwe. Ebi byona noobu biribaho, ekiniga MUKAMA tikirimuhwaho, aliikara agoroire omukono afubire.

⁵MUKAMA akagamba ati: “Ha Asiriya” Asiriya niyo nyekoonyeza nk'ekiduuma eky'okufubiza abo aba mbihiize,

⁶ndimutuma aramagire ihanga eritaikiriza Ruhanga, ndimuragira arwanise abantu abambiihiize abaiheho emyandu kandi abanyage, abakanjaige nk'esaabu ey'omu makuute.

⁷Baitu uwe eki tarukukyenda, omutima gwe tigurukukiteekereza; baitu eki arukugonza nukwo kuhwerekereza n'okumaraho amahanga maingi.

⁸Habwokuba naagamba ati: “Inywe abakama inywena, timuli ngabwa zange?

⁹Kalino terukusisana Kakemisi? Hamasi terukusisana Arupaadi? Samaliya terukusisana Damasiko?

¹⁰Nkooku nagoroire omukono gwange nfubire amakama agaaramyaga ebisisani, agakaba gaina ebisisani ebisarwirwe ebikooto okukira ebya Yerusaalemu na Samaliya,

¹¹Yerusaalemu n'ebisisani byayo, tingikole nkooku nakozire Samaliya n'ebisisani byayo?”

¹²Baitu MUKAMA naagamba ati: “Obundimara kukora eki ndukukoraho Orusozi Siyoni orwa Yerusaalemu, nubwo ndifubira omukama wa Siriya habw'emyehembo ye na habw'okwekuliiriza kwe.”

¹³Habwokuba naagamba ati: “Eki nkikozire habw'amaani gange na habw'amagezi gange, habwokuba ninyetegereza; nyihurwire emitaano y'amahanga, nyagire eby'obuguuda bwago; abo abakaba baikaliire ha ntebe, nkabateera hansi nk'enimi.

¹⁴Amahanga ag'ensi, gakaba nigasisana ekiju ky'enyonyi, kikanyanguhira kusorooza obuguuda bwago nk'omuntu arukusorooza amahuli. Hatabeho nyonyi eyayanjurwire ipapa kunkanga; hatabeho eyayasamize akanwa kunyamuliza!”

¹⁵Endemu, esobora kwenyumirizaaho, omuntu anyakugyasiisa rundi omusumeeno gusobora kwehemberaho kigusaza? Eki kiri nk'omwigo, omwigo tiguhimba muntu; omuntu nuwe ahimba omwigo.

¹⁶Habweki, MUKAMA, MUKAMA ow'amahe, abaserikale be ab'amaani, alibanagamu endwara kahwerekereza, ekitiinisa kye kiryaka nk'omurro.

¹⁷Ekyererezi kya Isirairi, kirifooka murro, kandi Ogu Arukwera alifooka nk'orulimi rw'omurro; ogulyokya gukasiiriiza amahwa n'amakerre ge omu kiro kimu.

¹⁸Ebibira ebirungi n'ensi ez'amaliisizo, birihwerekerezibwa nkendwara etatambwa oku ehwerekereza abantu.

¹⁹Emiti eyerisigaraho ha miti ey'ekibira kye, eriba nke muno, erisobora n'okubarwa omwana muto.

²⁰Mazimakwo ha kiro eki, abaliba basigaireho omu Isirairi, n'abaliba batabukireho ha b'enju ya Yakobbo, tibalyongera kwesiga ogu ayabaisire baitu balyesiga MUKAMA, Ogu Arukwera mali owa Isirairi.

²¹Abaliba basigaireho ha bantu ba Yakobbo, balikubukira Ruhanga ow'obusobozi.

²²Habwokuba, iwe Isirairi, abantu bawe noobu baraaba bali baingi nk'omusenyi gw'enyanja, halisigaraho bake muno.

²³Habwokuba, nkooku kyagambirwe, MUKAMA, MUKAMA ow'amahe alihwerekereza abantu ab'ensi yoona.

²⁴Habweki MUKAMA, MUKAMA ow'amahe naagamba ati: “Inywe abantu bange abanyakwikara Siyoni mutatiina, Abasiriya obu baliimukya emiigo yabo kubateera nk'Abamisiri oku baakozire.

²⁵Habwokuba omu kacu kake kati, ndirekera aho kubiihirirwa inywe, ndibiihirirwa Abasiriya mbahwerekereze.

²⁶MUKAMA ow'amahe, alibateeza embooko nkooku yakozire Abamidyani, ha mwandara ogwa Orebbu; omwigo gwe aligwimukya ha nyanja, aligwimukya nkooku yakozire omunsi Misiri.

²⁷Ha kiro eki, nubwo alibaiha omu busobozi bw'Abasiriya, abajune ekikoligo eki baabataire ha mabega.”

²⁸Ihe ery'abanyanzigwa lihambire orubuga Ai! Ebintu byabo babisigire Makimasi!

²⁹Enkiro bagicwanganiize, Gibbeya nuho barukwija kugoonya; Rama neetukumira; Gibbeya eya Saulo irukire.

³⁰Mwamuze inywe aba Galimu! Mutege amatu muhurre inywe aba Laisa, inywe aba Anatoosi, mumugarukemu!

³¹Aba Medimeena nibasingwa nibairuka enzarwa eza Gebimu nabo nibaserra h'okwesereka.

³²Kiro kya hati kinu, Abanyanzigwa barahika omurubuga noobu baraazinga entomi bazooleke orubuga Siyoni, orwa Yerusaalemu.

³³MUKAMA, Ow'obusobozi bwona, naija kubateera hansi nk'amataagi agatemerwe ha muti. Abakirra kimu okwekuliiriza n'abakirra kimu ekitiinisa nibaija kubundaazibwa.

³⁴Alibatema n'endemu nk'emiti ey'omu kibira hagati, bagwe nk'emiti emirungi muno eya Lebbanooni oku egwa.