Read Runyoro - rutooro Is 11 Bible Online

Is 11 - Runyoro - rutooro bible

Is 11

¹Omu kikoro kya Yesse halirugamu endokwa kandi itaagi liriruga omu mihama ye.

²Omuntu ogu, aliikarwaho Mwoyo wa MUKAMA, omwoyo ow'amagezi kandi ow'okwetegereza omwoyo ow'okuhabura kandi ow'amaani omwoyo ow'okumanya n'okutiina MUKAMA.

³Okusemererwa kwe, kuraabaga omu kutiina MUKAMA. Talicwa misango naasigikira ha kyemo ky'omuntu rundi naasigikira ha bigambo ebi arukugambirwa;

⁴baitu araacweraga abanaku naahondera obwinganiza, kandi aboorobi ab'omunsi, araabacweraga eby'obulyo; ekigambo kye, nugwo omwigo kateera abataina mbabazi, encwamu ye niyo ita ababi.

⁵Abantu be alibalemesa obulyo n'obwinganiza

⁶Omwaga guliikara n'ekyana ky'entaama, engo eribyama n'ekyana ky'embuzi, n'enyana, entale n'esajwa biriikara hamu; kandi omwana omuto araabifunyaga.

⁷Ente n'edubu birirya hamu; ebyana byazo biribyama hamu; entale erirya obunyansi nk'ente.

⁸Omwana arukwonka alizaanira ha kiina ky'encwera, kandi anyakucuukire alikwata ha kiina ky'empoma.

⁹Ebintu ebi tibirikora kabi kandi tibirihwerekereza kintu na kimu ha rusozi rwange orurukwera; habwokuba yoona eriba emanyiire kimu MUKAMA, nkooku amaizi gaijura omu nyanja.

¹⁰Ekiro kirihika, omukama omuhyaka ow'aliruga omu rulyo orw'abakama ab'enju ya Daudi, eki alizookeraho ali karorwaho k'amahanga. Abantu balyesorooleza omu rubuga rwe orw'obukama, bamuhe ekitiinisa.

¹¹Ha kiro eki, MUKAMA aligorra omukono gwe obwa kabiri, ajune abantu abaasigaireho abaihe Asiriya, Misiri, Patiroosi, Esopiya, Eramu, Sinaasi!

¹²Obu, nubwo aliimukiza amahanga ebendera, nubwo alisorooza Abaisirairi abaararangire, kandi nubwo alisorooza abaararangire ab'oruganda rwa Yuda, abaihe omunsonda ina ez'ensi.

¹³Obukama bwa Isirairi, tibuligaruka kukwatirwa Yuda ihali, kandi na Yuda taligaruka kuba munyanzigwa wa Isirairi.

¹⁴Baitu abo bombi baliseesira Abafirisiti aba Bugwaizooba, banyage abantu abaikara Burugaizooba. Balisingura abantu ab'Edomu n'aba Mowabbu, kandi ab'Amooni balibahurra.

¹⁵MUKAMA alyomya omukono ogw'enyanja ya Misiri n'omurro ogw'orwoya orw'akanwa ke, agorre omukono gwe ha nyanja agibaganizeemu obwambu musanju

¹⁶nukwo abantu bambuke nibarubata hoomere, atemere abantu be omuhanda. Abasigaireho baaruga omu kuzaahisibwa kw'Asiriya, nkooku yagutemiire Abaisirairi obu bakaba nibaruga Misiri.