Read Runyoro - rutooro Is 13 Bible Online

Is 13 - Runyoro - rutooro bible

Is 13

¹Binu nibyo ebigambo ebirukubaza hali Bbabbulooni, Isaaya mutabani w'Amozi ebi yagambiirwe Ruhanga.

²Ha mutwe gw'akasozi akali kwonka, nuho haimukire ebendera ey'obulemi! Mwamirre abaserikale, mubaimukize emikono nimubasimiza baseesire amalembo g'orubuga.

³Nyowe nyenka, ninyowe ndagiire abange abansoroire, ninyowe nyesire emanzi zange kuumara akaniga, bafubire abantu.

⁴Muhurre obwogo obunyakuli ha nsozi, nk'oburukuteerwa abantu abaingi! Muhurre okwimukiirwa kw'amahanga agarukwesorooza hamu! MUKAMA ow'amahe naazinisa ihe ery'okurwana obulemu.

⁵Amahe ago nigaruga omunsi eya hara, nigaruga haiguru nambere ligarukira, MUKAMA anyakwina ekiniga naija kuhwerekereza ensi yoona.

⁶Muteere empamo, habwokuba ekiro kya MUKAMA kiri haihi, nikyo ekiro ow'obusobozi bwona eki alihwerekererezaaho!

⁷Emikono ya buli muntu niija kuteba, abantu boona nibaija kukwatwa obutiini,

⁸nibaija kucwekwa enkizi; baliizirwa obusaalizi bwingi n'okuhururwa; baliba omu burumi nk'omukazi arukurumwa kuzaara. Balirorongana baina obutiini; amaiso galibatukura.

⁹Ekiro kya MUKAMA kiri haihi, ekiro ekitaroho kuganyira, ekiro eky'obukaya kandi eky'ekiniga ekingi eky'okufoora ensi kitongo n'okuhwerekereza abasiisi baayo kubamaramu.

¹⁰Habwokuba, enyunyuuzi ez'omwiguru n'ebihanda byazo tiziryaka; izooba liriimuka liswekerwe omwirima, kandi okwezi tikulijwa,

¹¹ndifubira ensi habw'obubi bwayo, nfubire ababi habw'ebibi byabo; ndihwerekereza okwekuliiriza kw'ab'emyehembo; ncwekereze emyebanaazo ey'abataina mbabazi.

¹²Abantu ndibakenya muno okukira zaabbu enungi, oruzaaro rw'abantu ndirukenya okukira zaabbu eya Ofiri,

¹³nyowe Mukama ow'obusobozi bwona, ha kiro ekindyolekeraho ekiniga kyange, iguru lirikankana, ensi eriteengeeta eruge omu kiikaro kyayo.

¹⁴Buli muntu alikubukira abantu b'owaabo, buli muntu aliiruka naatoma omunsi y'owaabo.

¹⁵Weena ow'alihikwaho, balimusohya, weena ow'alikwatwa balimwisa ekitara.

¹⁶Abaana baabo balitemwatemwa nabo baroleriire bati; amaju gaabo galinyagwa, bakazi baabo balihambwa,

¹⁷ndireetereza Abamedi abatagonza feeza kandi abataitwa zaabbu, baije babarwanise.

¹⁸Amata gaabo galiita abasigazi; abaana abato tibalibagirra embabazi.

¹⁹Bbabbulooni, ekitiinisa eky'amakama orubuga orurungi kandi orunyakwehuliza Abakaludaaya, rulisisana Sodomu na Gomora, ha kiro MUKAMA eki yazihwerekereriizeeho.

²⁰Tiruligarukwamu bantu, rundi kugaruka kwikarwamu, ebiro byona; tihalibaho Muharabu n'omu ow'aliteerayo eheema ye, abaliisa tibaligaruka kuliisizaayo magana gaabo.

²¹Ruraikarwamuga ebisoro eby'omu kisaka, amaju garaaraarwamuga ebisoro kaboigora; maaya nuho ziraraaraga, kandi nuho haraaziniraga ebyegasagasa.

²²Empisi nizo ziraayamulizaaga omu minaara yarwo, eboha ikungirege omu biikaro byarwo nyaburungi; akasumi karwo kali haihi muno, tirusigaize biro bingi.