Read Runyoro - rutooro Is 14 Bible Online

Is 14 - Runyoro - rutooro bible

Is 14

¹MUKAMA aliganyira Yakobbo, aligaruka akome Abaisirairi abate omunsi yabo yonyini, abanyamahanga balyetaba nabo, baikale n'ab'enju ya Yakobbo.

²Amahanga maingi galikoonyera abantu ba Isirairi bagaruke omunsi MUKAMA ei yabahaire, omunsi egi, oku Isirairi nuho alitungira amahanga ago, abafoole bairu n'abazaana bamuheereze. Abo, ira abaanyagire Isirairi, hati nuwe alibanyaga, aho abaabonesaaga abantu ba Isirairi, baliremwa Abaisirairi aba baabonesaaga.

³MUKAMA obu alimara kukuhuumuza, akakwiha omu bujune, omu muhito, akakwiha na ha mulimo ogw'amaani ogu obaire nookozesibwa,

⁴olyebugira omukama wa Bbabbulooni noogamba oti: “Haa, kabonesa bantu, kaagwire, ekiniga kye ekibamu emigayo ka kimurugireho!

⁵MUKAMA, ababi abaihiraho obusobozi,

⁶nubo abo abaabonaboneseze amahanga, abataralekere kuhiiganiza amahanga aga baasiigwire.

⁷Ensi yoona ehuumwire kandi eteekaine; abantu boona nibazina habw'omuhimbo.

⁸Emiti emisambya n'emikogoto eya Lebbanoni, neeyebuga habw'omukama ayagwire neegamba eti: ‘Omukama oli obu yakamazire kugenda, busaho n'omu ow'araagitema.’

⁹“Obu oliija, nyabuyonga eriimuka kukutangirra, eriimukya emizimu ekuramukye, eriimukya abo boona abakaba bali beebembezi b'ensi; eriimukya abo boona abakaba bali bakama b'amahanga, baruge ha bitebe byabo eby'obukama.

¹⁰Boona balibaza bakugambe bati: Hati na iwe, ofookere muceke nka itwe! Nitusisana”

¹¹Okaba oli muntu ayaheebwaga ekitiinisa, nooteererwa enanga, baitu hati oli omunsi ey'abafu. Enzito nikyo ekitabu eki obyamireho, kandi niyo bulangiti.

¹²Mawe, iwe enyunyuuzi ey'omu rukyakya, iwe kizaarwa emamba! Iwe ayasinguraga amahanga na iwe okatemwa wagwa ha nsi!

¹³Okaikara nooteekereza oti: “Nditemba omwiguru; ekitebe kyange eky'obukama, ndikita haiguru y'enyunyuuzi za Ruhanga; ndisinga ha rusozi orunyakuli hara ha bukiizi obw'emoso; nambere abantu baliba beesorooliize;

¹⁴nditemba haiguru muno mpingule ebicu, ndyesisaniza nk'Ogu anyakuli haiguru muno.”

¹⁵Baitu omu kiikaro eky'okugenda oku olesirwe nyabuyonga omu kicweka ekihamire kukira byona, omunsi ey'abafu.

¹⁶Abo abaraakurora, nibaija kukugumyaho amaiso bahunirre nibagamba bati: “Baitu onu, nuwe omusaija oli ayaleeteraga ensi kukankana, nuwe ruteengeesa makama,

¹⁷nuwe ayafoire ensi irungu yahwerekereza embuga zaayo, nuwe ataralekeraga abanyankomo be bakagaruka owaabo?”

¹⁸Abakama ab'amahanga, babyamire n'ekitiinisa, buli omu ali omu gasani ye;

¹⁹0aitu iwe, bakwihire omu gasani yawe baakunaga aheeru, omutumbi gwawe, gubuutikirwe emitumbi ey'abaserikale abaagwire omu bulemu, baaguhungura nseri.

²⁰Baitu habwokuba okahwerekereza ensi yawe, waita abantu bawe, tolitabaazibwa nk'abakama abandi. “Baijukuru b'enkozi z'ebibi, bataligaruka kugambwaho!

²¹Mutegeke ibaagiro habw'abanabe habwokusiisa kwa baisebo, bataliija kwimuka bakalya ensi n'ensi yoona bakagisweka embugo.”

²²MUKAMA ow'amahe naagamba ati: “Ndiimuka mbarwanise, ndibuuleeza Bbabbulooni ereke kugaruka kugambwaho, tihalibaho n'omu asigaraho, abaana n'abaijukuru.

²³Ndigifoora kiikaro ky'enyamunungu, ndigitamu ebiijongo by'amaizi, ndigisingorra n'ekisingolezo, ekirisingorra buli kintu kikakitwara hara.”

²⁴MUKAMA ow'amahe arahiire ati: “Eki nategekere nikyo kiribaho, kandi eki nahanwire, nikyo kirikorwa,

²⁵ndihwerekereza Abasiriya omunsi yange eya Isirairi, abarubaatiririrre ha nsozi zange. Abantu ndibajuna Abasiriya, mbaiheho emitumba ei bakaba bali b'okwetweka.”

²⁶Egi niyo entegeka yange, ei nategekiire ensi yoona; kandi ogu nugwo mukono gwange ogu ngoroire kugifubira.

²⁷MUKAMA ow'amahe eki yategekere, n'oha asobora kukidibya? Agoroire omukono gwe, n'oha asobora kugugarra enyuma?

²⁸Omu mwaka omukama Ahazi ogu yafeeriremu, hakarangwa ebigambo binu:

²⁹“Inywe abantu ba Firisitiya inywena, muleke kwesiima, ngu habwokuba omwigo ogwabatiire gucwekere, habwokuba obu hafa enjoka emu, omu kiikaro kyayo, hagarukamu erukukira obubi, kandi egi ekyana eki erizaara eriba njoka kahurruka.

³⁰Emizigaijo ey'abanaku eriiguta, kandi abaseege balitunga obusiinge; baitu abaijukuru bawe ndibaisa enjara, kandi abantu bawe boona abaasigaireho ndibaita.

³¹“Inywe Abafirisiti inywena, muteere empamo! Inywe ab'omu malembo, abali omu rubuga mutemu omukungo; mutiine! Habwokuba omwika niguruga ha bukiizi obw'emoso, niryo ihe eritarumu mutini n'omu omu bakuru balyo.”

³²Omuntu abakwenda b'ihanga alibagarukamu ki? MUKAMA nuwe yagumize Siyoni, kandi Siyoni egi, nubwo bwirukiro bw'abantu be abarukubonabonesibwa.