Read Runyoro - rutooro Is 16 Bible Online

Is 16 - Runyoro - rutooro bible

Is 16

¹Abantu batwekere Yerusaalemu ebyana by'entaama ebi baihire Sela. Baabitwekera omulemi ow'ensi egi, nibabirabya omuhanda ogw'irungu, baabihikya ha rusozi orw'abantu ba Siyoni,

²nkooku orora enyonyi ezirukuteera amapapa, nkooku orora obwana bw'enyonyi obuto nuho burarangira, abantu ba Mowabbu na bo, nukwo bali bati ha myogo y'Arunooni,

³nibagamba abantu ba Yuda bati: “Mutugambire eki muraakora, mutuswekerre nk'omuti oku guleeta ekiituuru omu bwire bw'ihangwe, mutuleke tuhuumule omu kiituuru kyanyu. Tuli basuuhuuki, mutusereke nambere tutasobora kuzoorwa muntu n'omu.

⁴Mutuleke twikale omunsi yanyu. Mutujune abo abarukwenda kutuhwerekereza. Ogu kabonabonesa obu aliba atakyaroho, okuhwerekerezibwa kuculiire, kandi anyakurubatirra abantu obu aliba arugire omunsi.

⁵Obu, nubwo omu ha baijukuru ba Daudi aliteera engoma, aliremesa, obwinganiza n'engonzi, araayanguhaga kukora ekihikire, kandi araakoraga kyona eki asobora okugendera ha bwinganiza.”

⁶Tukahurraho okwekuliiriza kw'abantu ba Mowabbu. Tubamanyire nkooku beehemba kandi nkooku beekuliiriza, baitu okwehaanira kwabo kwa busa.

⁷Habweki, Mowabbu ateere omukungo, abantu boona baterre Mowabbu empamo. Obu baraijukaga ebyokulya ebirungi ebi baalyaga omu rubuga Kiruharaseesi; balihwa amasiko.

⁸Amasamba n'emisiri eya Hesibooni ehwerekeriire emisiri egi eyajungwamuga amarwa agaatamirizaaga Yazeri, ha bukiizi obwa Burugaizooba eyesimba ha rubaju orumu orw'enyanja Enfu.

⁹Hati, nindirirra omuzabbibbu gwa Sihuna nkooku ndirirra Yazeri. Nindirirra Hesibooni n'Eryeri, habwokuba timwina eby'okugesa ebyokusembereza abantu.

¹⁰Omu misiri egi ey'orwezo, busayo muntu n'omu arukusemererwa, omu misiri ey'emizabbibbu, busayo n'omu arukutoka rundi arukuziha. Busaho arukurubata emizabbibbu kujunga amarwa; etoko ey'okusemererwa ngifuuhize.

¹¹Habweki, ninsinda habw'obujune obu nyina habwa Mowabbu, habw'obusaalizi obu ndukuhurra habwa Kiriheresi.

¹²Abantu ba Mowabbu noobu balyeyoleka, noobu balyejwahiza omu kiikaro ekikuru, noobu baligenda omu kiikaro kyabo ekirukwera kusaba, tibaligira mugaso ogu baihamu.

¹³Eki nikyo ekigambo MUKAMA eki yagambire ira hali Mowabbu

¹⁴kandi hati naagamba ati: “Omu kasumi ak'emyaka esatu, nk'ey'omuntu kakolerra empeera, Abamowabbu noobu baraaba bali baingi bata, balitandika kuganya! Kandi abo abaliba basigaireho, baliba mbarwa kandi baceke.”