Read Runyoro - rutooro Is 17 Bible Online

Is 17 - Runyoro - rutooro bible

Is 17

¹Binu nibyo ebigambo ebyagambirweho Damasiko: Damasiko, terigaruka kwetwa rubuga, yoona eriba bikamburo bisa.

²Embuga zaayo abantu baliirugiramu kimu obutaigarukamu garaabaga maliisizo ag'amagana, agaraayekulinguraga nkooku garukwenda hataroho n'omu arukugakanga.

³MUKAMA naagamba ati: Ebyombeko ebigumire tibirizooka omu Efuraimu, n'obukama buliruga Damasiko, abaliba basigaireho ha Basamaliya, balikorwa nk'ekitiinisa ky'abaana ba Isirairi oku kyakozirwe.

⁴Ha kiro eki, ekitiinisa kya Yakobbo kirihwaho, kandi ogu ow'akaba agomokere, alyanuka.

⁵Isirairi, alisisana nk'omusiri ogumazire kugeswamu engano, asigale kwonka nk'omusiri ogw'omukihanga kya Rregaimu, obu guba gumazire kugeswa.

⁶MUKAMA Ruhanga owa Isirairi naagamba ati: Halisigaraho abantu mbarwa mali, Isirairi alisisana nk'omuti Omuzabbibbu, ogunyakunogerweho ebijuma byona, gusigairweho ebijuma bibiri rundi bisatu omu masonsolya rundi obujuma obuke obunyakuli ha mataagi agahansi.

⁷Ha kiro eki, abantu balitamu Omuhangi wabo ekitiinisa, amaiso gaabo, baligahanga Ogu, Arukwera owa Isirairi;

⁸tibalitamu kitiinisa amatambiro, aga baakozire n'emikono yabo, tibalitunurra ebi, ebi baakozire n'engaro zaabo, nk'Asera, rundi itambiro erinyakucumiikirwaho obubbani.

⁹Ha kiro eki, embuga zaabo ez'amaani ezigumire zirisisana nk'ebifurukwa eby'Abahiivi, n'eby'Abamooli, ebi baabingirwemu abaana ba Isirairi, zaafooka matongo.

¹⁰Habwokuba, okeebwa Ruhanga omujuni wawe, otaijuke ogu, obwirukiro bwawe, habweki, noobu orabyara ebibyarwa ebinyakusemereza abantu, okatamu enkora ey'omucwezi omunyaihanga,

¹¹ebi noobu okubikuliza ha kiro eki obibyaliireho, okabiragira bikaakya kiro eki obwire nibukya; nabwo toligira eki oligesa. Oliizirwa emihito yonka, n'obusaalizi obutasobora kutambwa.

¹²Dora abantu baingi baliba omu kajagarro, akajagarro nk'ak'enyanja erukuhirra! Dora, amahanga galiba omu kuborooga, nk'amaizi amaingi oku gahirra!

¹³Amahanga galigenda omumaiso nk'ebigonzi eby'amaani, baitu Ruhanga aligacoomera gagaruke enyuma nk'omusunga, ogwa ha nsozi oku guhuuhurwa omuyaga, nk'ebisusu ebirukutwarwa.

¹⁴Omu kasumi ak'oorwiririzi, habaho obutiini obutagambwa! Obwire butakakiire, haba hatakyaroho kantu! Ogu nugwo omugabo ogw'abantu abo abatunyaga, egi niyo empeera, enyakuheebwa abanyakutunyakuraho ebyaitu.