Read Runyoro - rutooro Is 18 Bible Online

Is 18 - Runyoro - rutooro bible

Is 18

¹Ai bambi, nsi iwe erukuhulirwamu amapapa agarukuhuuma, ey'obuseeri bw'ebisaaru by'Esopiya,

²iwe anyakutuma engabwa noozirabya ha kisaaru Nairo, omu maato ag'ebifunjo! Inywe abakwenda abarukwanguha mugende omu ihanga ery'abantu abaraihire kandi abaina omubiri omurungi, abantu abarukutiinwa aba haihi n'aba hara, ihanga ery'amaani kandi erinyakusingura, erinyakwina ensi erukubaganizibwamu ebisaaru.

³Inywe inywena abantu ab'ensi yoona, inywe abanyakwikara omunsi, ebendera obu eriimukibwa ha mitwe y'ensozi, mufundule amaiso! Obu mulihurra engwara yagamba, mutege amatu!

⁴Habwokuba MUKAMA akangambira ati: “Ndyema omwiguru, ndole eby'omunsi, mporampora nk'orume oku rugwa omu bwire bw'ekiro oburukutagata obw'akasumi k'igesa, ninzooka kurungi nk'omusana oku gujwa omu bwire bw'ihangwe.”

⁵Habwokuba orwakyo obu rulimara kuragalika, igesa litakahikire, kandi ebijuma bitakengere, omunyanzigwa alihwerekereza bwango Abasuudani nkooku omuhyo gwiha amataagi ha muzabbibbu.

⁶Emitumbi ey'abaserikale baabo, eriikara aho omu burangasa, esomwe amanyonyi, ekaturwe n'enyamaiswa ez'omu kisaka. Amanyonyi galigyehiira omu kasumi k'ekyanda, kandi enyamaiswa omu irumbi.

⁷Omu kasumi ako, abantu abaraihire kandi abaina emibiri erukuterra, abantu abayakutiinwa aba haihi n'aba hara, ihanga ery'amaani kandi erinyakusingura, erinyakwina ensi enyakubaganiziibwemu ebisaaru, nubwo lirirabuka ebisembo MUKAMA ow'amahe, babitwale ha rusozi Siyoni, ekiikaro MUKAMA Ow'obusobozi bwona eki aramizibwamu.