Read Runyoro - rutooro Is 19 Bible Online

Is 19 - Runyoro - rutooro bible

Is 19

¹Binu nibyo ebigambo ebyarangirweho ensi Misiri. MUKAMA aliija omunsi Misiri, naizira ha kicu ekirukwanguha; abacwezi ba Misiri obu balimubona, balitukumira, abantu boona abalimarwaho, obutiini bulyenda kubaita.

²Nditabangura Abantu ba Misiri barwanise Abanyamisiri bagenzi baabo, abantu balirwana, nyineemu erwanisangane, omutaahi arwanise omutaahi, orubuga rurwanise orubuga orundi, obukama burwanise obukama.

³Abanyamisiri balihwa amasiko; ndibaburanganiza omu byona ebi barukwenda kukora; baligenda kwekaguzaaho: abacwezi, embandwa, abanyakubandwa emizimu, n'abarogo;

⁴MUKAMA ow'amahe naagamba ati: Abanyamisiri ndibaha omukuru atarukusoboka, ndibaha omukama ataina mbabazi nuwe abaleme.

⁵Amaizi ag'ekisaaru Nairo galyoma; kirihweramu kimu akanyansi, kiburwemu n'otwizi;

⁶emikura yakyo, erinuunka, emikono ey'ekisaaru Nairo ekya Misiri erikeehwamu amaizi eyomere kimu, amabingo n'omugugu birijunda bihweho.

⁷Ebiikaro ebya haihi na Nairo, tibiribamu kantu, ebintu byona ebiriba bisigirwe ha mukungu gwa Nairo, n'omu biikaro ebikiheriire biryomera kimu, birihuuhurwa omuyaga, tibirigaruka kuzooka.

⁸Abasohi b'encu, balirra batemu ekyoboobo, abo boona abanyakunaga irobo omu Nairo, abanyakutega obutimba omu kisaaru eki, balihwa amaani.

⁹Abakozi abanyakuteera obugoigo n'abo abanyakwongosa engoye eza pamba erukwera, balihwa amasiko.

¹⁰Abantu abo abali nk'enyomyo z'ensi, balihwaho, n'abo boona abanyakukolerra empeera balisaalirwa.

¹¹Abeeebembezi aba Siyoni, badoma cuu; abahabuzi ba Faraaho eby'amagezi nibamuhabura eby'obudoma. Osobora ota kugamba Faraaho oti: “Nyowe ndi mwana w'abantu ab'amagezi? Nkazaarwa abakama aba ira?”

¹²Hati abantu bawe abanyamagezi abo, baraha? Bakugambire kandi bakumanyise MUKAMA ow'amahe eki yateekaniriize Misiri.

¹³Abeebembezi ba Siyoni bakwasirwe obudoma kandi aba Noofu nibabiihwabiihwa; abo abarukuzooka nk'obugumizo obw'enganda, nubo baahabisize Misiri.

¹⁴MUKAMA abahaire kuhabura abantu ebirukubahabisa. Ekirugire omuli eki, Misiri byona ebi erukukora neebisobya, kandi neetahukatahuka nk'omutamiizi oku atahukira ha ntanaki ye.

¹⁵Busaho muntu n'omu omunsi Misiri, omuguuda rundi omunaku, ow'ekitiinisa, rundi atarukumanywa arukusobora kugira eki akora.

¹⁶Ha kiro eki, Abanyamisiri baliba nk'abakazi, balitukumira habw'obutiini, nibarora MUKAMA ow'amahe agoroire omukono kubafubira.

¹⁷Ensi ya Yuda, nayo eritiinisa Abanyamisiri, weena ow'aligambirwa, alitiina, habw'ebi MUKAMA ow'amahe ebi yabategekiire.

¹⁸Akasumi ako obu kalihika, omunsi Misiri halibamu embuga itaano eziribaza engambo ey'Abanyakanaani, kandi balirahira MUKAMA ow'amahe. Orumu hali zo, nurwo rulyetwa rubuga rwa Izooba.

¹⁹Akasumi ako obu kalihika, halibaho itambiro eririkolerwa MUKAMA hagati y'ensi eya Misiri habeho n'enyomyo eyeribyalirwa Mukama ha mutaano gwayo.

²⁰Ebi byombi, nuko kaliba karorwaho kandi bwakaiso bwa MUKAMA ow'amahe, omunsi ya Misiri; abantu ab'omunsi egi, obu baraaterraga MUKAMA enduuru, habw'abo abarukubabonesa, araabatwekeraga omujuni abarwanirre kandi abajune.

²¹MUKAMA alibeemanyisa; kandi omu kasumi ako, balimumanya bamuramye, bamutambire ebyonzira, bamuhongere ebihongwa eby'okwokya, balimuraganiza ebintu kandi babihikirize.

²²MUKAMA alifubira Abanyamisiri, baitu noobu alibafubira, kandi alibatambira balimukubukira, alibaha eki barukusaba, abatambire.

²³Akasumi ako obu kalihika, halibaho omuhanda ogurukuruga Misiri nigugenda Asiriya, Abasiriya baraagendaga Misiri, kandi abanyamisiri baragendaga Asiriya. Abanyamisiri n'Abasiriya, baraaramizaga hamu.

²⁴Akasumi ako obu kalihika, Isirairi eringana ekitiinisa, Misiri n'Asiriya, kandi amahanga asatu ago, nugo galihaisa ensi yoona omugisa.

²⁵MUKAMA ow'obusobozi bwona aligaha omugisa naagamba ati: “Ndibaha omugisa inywe Abanyamisiri, abantu bange; inywe Abasiriya abanahangire, na inywe Abaisirairi abantu bange aba nayegomboize.”