Read Runyoro - rutooro Is 2 Bible Online

Is 2 - Runyoro - rutooro bible

Is 2

¹Binu nibyo ebigambo, Ruhanga ebi yagambiire Isaaya mutabani w'Amozi, hali Yuda na Yerusaalemu:

²Akasumi kalihika omu biro eby'omumaiso, orusozi orulyombekwaho Enju ya MUKAMA, ruligumibwa okukirra kimu ensozi zoona, rulinyumizibwa okukirra kimu ensozi zoona, kandi amahanga goona nuho galyeseesa.

³Abantu baingi baligamba bati: “Mwije tugende ha rusozi rwa MUKAMA, mwije tugende ha nju eya Ruhanga owa Yakobbo; atwegese eby'arukwenda tukole, nukwo tukwate emihanda ey'alitwoleka.” Habwokuba, Siyoni niyo erirugwamu Ebiragiro, kandi Yerusaalemu nuho haliruga ekigambo kya MUKAMA.

⁴Alicwa emisango y'amahanga maingi; nuwe alicweramu abantu; ebitara byabo balibiheesamu enfuka, amacumu gaabo bagaheesemu ebisalizo, ihanga tiririrwanisa ihanga ligenzi lyalyo, tihaligaruka kubaho obulemu.

⁵Weewe enju ya Yakobbo, oije tugendere omukyererezi kya MUKAMA.

⁶Ai Ruhaga, okanagaija abantu bawe, niyo enju ya Yakobbo, habwokuba baina embandwa nyingi ezaarugire Burugaizooba, baina n'abafumu baingi abarukusisana Abafirisiti, kandi nibaganjana n'abanyamahanga.

⁷Ensi yabo erumu efeeza n'ezaabbu nyingi, obuguuda bubahinguraine; ensi yabo ijwire embaraasi, ebigaali byabo butabarwa.

⁸Ensi yabo erumu abadoma baingi; nibaramya ebintu ebi baakozire n'emikono yabo.

⁹Habweki, omuntu abundaazibwa kandi abantu bagarurwa hansi otabaganyira!

¹⁰Taaha omu mwandara oyesereke omu cuucu, baitu oruge omumaiso ga MUKAMA, oruge omu kitiinisa eky'obukuru bwe.

¹¹Amaiso g'omuntu ag'emyehembo galiigarwa, okwekuliiriza kw'abantu kulimarwaho hakiro eki, MUKAMA wenka nuwe alinyumizibwa.

¹²Habwokuba aina ekiro eky'alibundaalizaaho weena anyakwekuliiriza, na weena anyakwehemba.

¹³Eky'alihwerekererezaaho emikogoto enyakuraihire yoona eya Lebbanooni n'emihomozi eya Bbasani;

¹⁴eky'alinganirizaaho ensozi zoona eziraihire, n'obusozi bwona oburaihire,

¹⁵eky'aliihiraho omunaara gwona oguraihire n'ekisiika kyona ekigumire;

¹⁶eky'aliihiraho meeri zoona Tarasisi, kandi eky'aliihiraho ebintu ebisemereza amaiso g'omuntu.

¹⁷Okwekuliiriza kw'omuntu kulicwekerezibwa n'emyehembo ye erihwerekerezibwa; ha kiro eki, MUKAMA wenka nuwe alinyumizibwa.

¹⁸Ebisisani birihweraho kimu,

¹⁹abantu balitaahira amaingira ag'omu myandara n'omu biina eby'omwitaka, baruge omumaiso ga MUKAMA, baruge n'omu kitiinisa eky'obukuru bwe.

²⁰Ha kiro eki, abantu ebisisani eby'efeeza n'ezaabbu eby'okuramya ebi baayekoliire n'emikono yabo, nubwo balibihungura aheeru babinagire ebihukuzi n'ebihuguhugu,

²¹bataahire amaingira ag'emyandara n'omu nyatika ez'amabaale, baruge omumaiso ga MUKAMA, baruge n'omu kitiinisa eky'obukurubwe, obwaliija kutengesa ensi.

²²Otalyongera kwesiga abantu abanyakufa, habwokuba bamugaso ki?