Read Runyoro - rutooro Is 21 Bible Online

Is 21 - Runyoro - rutooro bible

Is 21

¹Okuragura ha kwoma kw'enyanja nk'akairiringwa oku kateera nikacwanganiza irungu, n'akabi nukwo kaliija nikaruga omunsi erukutiinisa.

²Nyolekerwe okwolekwa kwobusinge, omukozi wobugobya akora ebyobugobya; omuhwerekereza nahwerekereza. Iwe ihe ery'Eramu seesa! Iwe ihe erya Mediya, gota embuga! Ruhanga naija kumaraho emihito eyaleesirwe Bbabbulooni.

³Eki naboine kandi eki nahuliire omukwolekwa kwange, kikantiinisa kandi kikansaaliza muno, nkahurra obusaalizi nk'obw'omukazi arukurumwa kuzaara nukwo ndukurumuwa nti tindukusobora kuhura; nikwo nsobirwe nti tinkusobora kurora.

⁴Nkwasirwe akaizigoleze, kandi obutiini bw'okunyita nkaba nindirirra obwire kwira, baitu noobu bwizire, tibwina eki bundeetiire, bundeetiire obutiini.

⁵Omu kwolekwa nkarora obugenyi buteekanizibwe, nibarra emikeeka abagenyi ei baraikarraho, mbabo baatandika kulya n'okunywa. Ahonaaho engabwa yaragira eti: Inywe abeebembezi! “Muteekanize engabu zanyu!”

⁶Hanyuma MUKAMA akangambira ati: “Genda oteho omulinzi, omuragire arange kyona eki araakarora.

⁷Obu alirora abasaija babiri babiri batembere embaraasi, abasaija abatembere enkaina n'engamiya, abateho muno omutima abahulirize.”

⁸Nubwo omulinzi yagambire n'iraka likooto ati: “Waitu ntaaha nindinda omu kaju kange nyamusana n'ekiro.”

⁹Lero hati, mbanu baija! Abasaija babiribabiri batembere embaraasi, yayongera yagamba ati: “Orubuga Bbabbulooni, rugwire, rugwire; ebisisani byona eby'embandwa zaabo zicwacwainwe biri ha butaka.”

¹⁰Inywe bantu bange Abaisirairi, muhwirwe nk'engano, baitu hati mbagambiire amakuru amarungi aga ngambiirwe MUKAMA Ow'Obusobozi bwona, Ruhanga owa Isirairi.

¹¹Binu nibyo bigambo ebirukugambwaho Duma. Haroho omuntu arukunyeta naayema Seyiri, naagamba ati: “Weewe iwe omulinzi, obwire buraakya di? Ongambire obwire buraakya di.”

¹²Omulinzi yagarukamu ati: “Obwire nibwija kukya, baitu kandi nibugaruka nibwira, obu oraaba nooyenda kukaguza obwakabiri, ogaruke okaguze.”

¹³Inywe abantu Ab'Adedani, nimwija kugoonya omu bibira by'Arabbiya.

¹⁴Inywe enzaarwa za Teema muhe abaina iroho amaizi, muhe abasingwa ebyokulya.

¹⁵Habwokuba bairukire ebitara, bairukire ebitara ebigoroirwe, bairukire obuta obuleegerwe, kandi bairukire obulemu obusaaliire.

¹⁶Habwokuba MUKAMA akangambira ati: “Omukasumi ak'omwaka gumu, nk'emyaka y'omukozi nkooku eri, ekitiinisa kyona ekitiinisa kya Kedara kirihwaho;

¹⁷kandi abaliba basigaireho ha barasi b'obuta ab'abantu ab'amaani aba batabani ba Kedara, baliba mbarwa; habwokuba MUKAMA Ruhanga wa Isirairi nuwe agambire ekigambo eki.”