Read Runyoro - rutooro Is 22 Bible Online

Is 22 - Runyoro - rutooro bible

Is 22

¹Binu nibyo ebigambo ebyagambirwe ha kihanga eky'okwolekwa. Inywe inywena abatembere ha maju eruguru mutembiireyo ki?

²Inywe abanyakwikara omu rubuga orunyakurumu etoko nyingi, abanyakuli omu rubuga orurukukyanganuka. Abantu banyu abanyakufiire, mutagira ngu baisirwe ebitara rundi bagwire omu bulemu.

³Abalemi banyu bairukiire hamu bakabakwata baabarasa n'obuta. Boona omuliinywe abaahikirweho bakakwatwa, kandi kunu bakaba bairukire bagenzire hara muno.

⁴Nikyo ndukugambira nti: “Ondeke mbonabone, nkakyekorra nyenka; oleke kutalibana kumpumuza habw'abantu bange kuferwa muhara waabo.”

⁵Habwokuba MUKAMA Ruhanga ow'amahe, aina ekiro eky'etoko, eky'okurubaatirra, eky'okuburanganiza omu kihanga eky'okwolekwa, aina ekiro eky'okuseesa ebisiika kandi eky'okwaliirirraho ensozi.

⁶Eramu nuwe yahimbire ensahu, ebigaali n'abatembi b'embaraasi, kandi Kiiri, uwe akasuukura engabu.

⁷Ebihanga byawe ebirukukirra kimu oburungi bikaijura ebigaali kandi abatembi b'embaraasi bakeemerra omu malembo.

⁸Atwaire ekyesweko kya Yuda. Ha kiro eki okarora ebyokurwanisa eby'enju ey'ekibira,

⁹Kandi akarora entindo ez'orubuga rwa Daudi nkooku ziri nyingi wasorooza amaizi ag'ekiijongo ekyaifo.

¹⁰Mukabara amaju ga Yerusaalemu, mwaseesa amaju nukwo mutunge amabaale ag'okugumya ekisiika.

¹¹Mukakora etanka enkooto hagati y'ebisiika bibiri ey'okutamu amaizi ag'ekiijongo ekikuru. Baitu ogu ayakozire ekiijongo eki mutamutekerezeho kandi mutatemu kitiinisa ogu ayakitegekere ira muno.

¹²Ha kiro eki, MUKAMA Ruhanga ow'amahe, nubwo yabeesire muteere empamo kandi murre, mwemwe isoke kandi mujwale eguniya; baitu omu kiikaro ky'okurra,

¹³mukakyanganuka, kandi mwasemererwa, mukaita enimi n'entaama; mukalya enyama mwanywa amaarwa mwayegambira muti: “Leka tulye, tunywe, habwokuba kiro kya ijo, tuli b'okufa.”

¹⁴Habwokuba MUKAMA ow'amahe anyeyolekere yaangambira ati: “Mazimakwo timurukwija kuganyirwa obubi bunu, okuhika obu mulikafa.” Ebi, MUKAMA Ruhanga ow'amahe, nuwe abigambire.

¹⁵MUKAMA Ruhanga ow'amahe naagamba ati: “Irooku ogende orole Sebbuna omuheereza, anyakurolerra enju yoona omukaguze oti:

¹⁶Hanu nookoraho ki? Kandi oinaho oha anyakukwikiriize kwerimira hanu ekituuro, iwe anyakwina ekituuro ha rusozi n'okweserurra ekiikaro omu mwandara?

¹⁷Iwe omusaija kirimaani MUKAMA naija kukumiisa hara, naija kukukwatira kimu akugumye,

¹⁸akuhungyahungye, akuhungule nk'omupiira, ogwe omunsi enyakugalihire; oku nuho oligwa, kandi nuho haliba ebigaali byawe ebirungi ebikwehuliza, okwase ensoni enju ya MUKAMA wawe.

¹⁹Ndikwiha omu ofiisi yawe, nkubinge omukiikaro kyawe.

²⁰“Ha kiro eki, ndyeeta omuheereza wange Eryakimu, mutabani wa Hirikiya,

²¹ndimujweka busuuti yaawe muteege omweko gwawe, muhe obusobozi bwawe bwona obu okaba oinabwo; aliba nka ise abantu boona enzaarwa eza Yerusaalemu, n'ab'enju ya Yuda.

²²Ndimukwasa ekisuumuruzo eky'enju ya Daudi; eky'araakinguraga, tihaabehoga n'omu akukinga, kandi eky'araakinganga, tihaabehoga n'omu akikingura.

²³Ndimuboha nkengango omu kiikaro eky'amazima kandi alireetera enju yaise ekitiinisa.

²⁴“Balimutaho obulemeezi bwona obw'enju ya ise, abaana n'oruzaaro rwabo, buli kikwato kyona ekitoito, okurugirra ha bikopo okugarukira hantugiro.

²⁵MUKAMA ow'amahe naagamba ati: Ha kiro eki, ekikondo kiri ekyasimbirwe omu kiikaro ekigumire, kiriyuga, kiritemwa kigwe hansi, ebintu byona ebikaba bibohiirweho, aho nuho birihwerekererra.” Eki, MUKAMA nuwe akigambire.