Read Runyoro - rutooro Is 23 Bible Online

Is 23 - Runyoro - rutooro bible

Is 23

¹Binu nibyo ebigambo ebyagambirwe hali Tiiro. Inywe abalimba abanyakurugire omunyanja muteere empamo habwokuba Tiiro ehwerekereziibwe, tesigaize nju noobwakuba omwaro! Eki, abantu bakigambiirwe aba Kupuro.

²Inywe enzaarwa eza ha mukungu, inywe abasuubuzi abakuru aba Sidoni, muculeere; abakwenda banyu bakambuka enyanja

³baahika ha maizi amaingi; sente zanyu mwatungire niyo engano ya Sihora, n'amagesa aga Nairo; niiwe okaba oli musuubuzi w'amahanga.

⁴Kwatwa ensoni, iwe Sidoni, habwokuba enyanja egambire eti: “Tinkarumwaga bisa kandi tinkazaaraga, tinkoorooraga aboojo abato kandi tinkatendekaga baisiki empikiire.”

⁵Amakuru obu galihika Misiri, abantu balisaalirwa habw'okuhurra amakuru agarukugambwaho Tiiro.

⁶Inywe enzaarwa eza ha mukungu, muteere empamo, mwambuke mugende Tarasiisi!

⁷Runu, nurwo orubuga rwanyu orw'omuhimbo, orwabaireho omubiro ebyaira, Runu nurwo orubuga orwatwekere abantu obuseeri bw'enyanja kutungayo ensi n'okuziikaramu?

⁸N'oha ayategekere kukora hali Tiiro ekintu nk'eki? Tiiro enyakujweka abantu ekondo, ey'ekaba ina abasuubuzi abakuru abaaliire obunyoro, ey'ekaba ina abasuubuzi abato abakaba bali bantu b'ekitiinisa omunsi?

⁹MUKAMA w'amahe nuwe yakitegekere kuswaaza emyehembo y'ekitinisa kyona, okukurasa ensoni ab'ekitiinisa boona ab'omunsi.

¹⁰Inywe abantu ba Tarasiisi, mweyanjale omunsi yanyu, nk'ekyambu Nairo oku kyayeyanjaire; tihakyaroho arukubateera ha mukono.

¹¹MUKAMA agoroire omukono gwe ha nyanja, kandi ahwerekeriize amakama; aturukize ekiragiro ekirukukwata hali Kanaani ekikuragira ngu: ebigo byayo bihwerekerezibwe.

¹²Akongera yagamba ati: “Iwe muhara wa Sidoni empikiirre arukubonabonesibwa imuka ogende Kupuro, baitu noobu oraagyayo, totungeyo businge.”

¹³Murole ensi ey'Abakalidaaya tibali Basiriya abaalekere enyamaiswa ez'omu kisaka kwijura omunsi Tiiro, nubo baayombekere eminaara ey'okugoteramu, nubo baaseesire ebikali byayo, nubo baagifoire kikamburo.

¹⁴Mucule inywe ebyombo bya Tarasiisi habwokuba orukomera rwanyu orwamaani ruseserwe.

¹⁵Haliija akasumi, Tiiro obu baligyebwa habw'emyaka nsanju nk'akasumi omukama akaamara naalema. Emyaka nsanju obu erihwaho, Tiiro erisisana nka malaaya ayagambirweho omu kizina ati:

¹⁶“Iwe malaaya ayayebere ira, kwata enanga oyehingulirize orubuga! Gamba ebigambo ebirungi, zina ebizina bingi, nukwo ogaruke oijukwe.”

¹⁷Emyaka nsanju obwerihwaho, MUKAMA alibungira Tiiro, erigaruka ha busuubuzi bwayo obwa ira, erisiihana n'abantu ab'amakama goona ag'omunsi.

¹⁸Ebintu byayo eby'obusuubuzi na sente zaayo, birihongerwa MUKAMA; biryahurwa rundi kusoroozibwa, baitu biriihwamu ebyokulya bingi muno, n'ebyokujwara ebirukwetaagwa abantu abanyakuramya MUKAMA.