Read Runyoro - rutooro Is 25 Bible Online

Is 25 - Runyoro - rutooro bible

Is 25

¹Ai MUKAMA, niiwe Ruhanga wange, ndaakunyumizaanga, ndaahaisanizaaga ibara lyawe; habwokuba okakora ebintu ebinyakuhuniriza, okahikiriza byona ebi wategekere ira, ebirumu obwesige n'amananu.

²Habwokuba orubuga okarufoora ntuumo y'amabaale, orubuga orugumire warufoora kikamburo; ekikaali ky'abanyamahanga tikikyaroho, tikirigaruka kwombekwa.

³Habweki, amahanga ag'amaani galikunyumiza; embuga ez'amahanga againa embabazi galikutiina.

⁴Habwokuba; niiwe bwirukiro bw'abanaku, bwirukiro bw'abaseege abanyakuli omu muhito, niiwe bwigamo obunyakwirukirwamu abarukwiruka ihuunga kandi niiwe kiituuru ekinyakuhuumulirwamu abarukwiruka ekitunguutano. Abantu abataina mbabazi, baseesa nk'omuyaga gw'irumbi,

⁵nk'omusana ogw'amaani ogw'omu kiikaro ekyomere, niiwe oliculeeza abanyamahanga; nk'ekitunguutano oku kizimibwa ekiituuru ky'ekicu, nukwo na iwe oculeeza etoko ey'abataina mbabazi.

⁶Ha rusozi runu, MUKAMA nuho alicumbirirra amahanga goona obugenyi obw'ebintu eby'ebisajwa, obugenyi obwa viini nambere hatali muyaga, obugenyi obw'ebintu ebinyakwijwire omusoina, obwa viini ejungirwe kurungi.

⁷Ha rusozi runu, nuho aliihira ekyesweko ekyabutikiire amahanga goona, nuho aliihira ekitambaara ekyaswekeriire amahanga goona.

⁸MUKAMA Ruhanga alimarraho kimu orufu, alisusura amaizi bona abarukurra, kandi aliihaho abantu be ekihemu omunsi yoona, habwokuba MUKAMA nuwe agambire eki.

⁹Ekiro eki, kiriba ky'obujune, buli muntu aligamba ati: “Onu nuwe Ruhanga waitu ou twategeriize kutujuna. Onu nuwe MUKAMA ou twategeriize; tusemererwe, tukyanganuke, habwokuba atujunire.”

¹⁰MUKAMA alijuna orusozi Siyoni, baitu abantu ba Mowabbu, balirubatirirwa nk'ebisunga oku birubaatirirwa bifooke orwezo.

¹¹Alyanjurra emikono hagati yarwo, nk'omuzihi oku akora obu aba naaziha; alimaraho ekitiinisa kye hamu n'amagezi ag'emikono ye.

¹²Ebigo eby'ekitiinisa ebinyakwehinguliriziibwe ebisiika ebinyakugumire, alibiseesa abihwerekereze, abiteere hansi, abifoole cuucu.