Read Runyoro - rutooro Is 26 Bible Online

Is 26 - Runyoro - rutooro bible

Is 26

¹Ha kiro eki, ab'omunsi ya Yuda, balizina ekizina ekirukugamba kiti: “Twina orubuga orugumire; MUKAMA atulinda akatuzitirra orugo n'ekisiika ekigumire.

²Mukingule amalembo, ihanga erirungi erinyakulinda obwesige litaahe.

³Omuntu anyakutaho omutima omuha obusinge obusemeriire, habwokuba naakwesiga.

⁴Mwesigege MUKAMA ebiro byona, habwokuba MUKAMA Ruhanga nugwo omwandara ogwa buli nabuli.

⁵Habwokuba akabundaaza abo abanyakwikara haiguru omu rubuga orwa haiguru. Orubuga oru naija kurusiisa arunage hansi, arufoole cuucu.

⁶Abo abakaba nibabonabonesibwa, hati nurwo barukurabaho, nurwo barukurubaatiirra.”

⁷Omuhanda ogw'abantu abarungi gutereekeriire, abarungi niiwe obasemereza omuhanda.

⁸Ai MUKAMA, tukaikara nitunihira omuli iwe, nitugendera omu muhanda ogw'encwamu yawe; ibara lyawe, n'okukwijuka nibyo omutima gwawe gugonza muno.

⁹Omu bwire bw'ekiro, omutima gwange gukulirirra, omwoyo gwange gukuserra gwina ekihika. Habwokuba obu ocwera ensi omusango n'abantu baayo, abantu boona nubwo bamanya amakuru g'obwinganiza.

¹⁰Ababi noobu obagirra embabazi, tibeega kukora ekihikire, noobwakubaire hanu omunsi ey'abantu abarungi, nabwo nibakyakora ebitahikire; bakyayangire kwetegereza obukuru bwawe.

¹¹Ai MUKAMA, oimukize omukono baitu abantu tibarukugurora, obooleke nkooku orukugonza muno abantu bawe, nukwo bakwatwe ensoni, omurro ogukaba guteekaniriziibwe abazigu bawe gubamaleho.

¹²MUKAMA, niiwe olituha obusinge, habwokuba otuha ebisemeriire ebikorwa byaitu.

¹³Ai MUKAMA Ruhanga waitu, abakama abandi abatali iwe, nubo baatulemere, baitu tiharoho n'omu ou twikiriza kukira iwe, busaho ibara eri twatura kukira eryawe.

¹⁴Bakafa tibaligaruka kwomeera; biituuru, tibaliimuka; habwokuba niiwe wabafubiire wabahwerekereza, tiharoho n'omu asobora kwongera kubaijuka.

¹⁵Ai MUKAMA, niiwe wakulize ihanga lyaitu, niiwe wagalihize ensi yalyo ha mbaju zoona; eki nikyo kyakurugiiremu ekitiinisa.

¹⁶Ai MUKAMA, obu bakaba bali omu muhito bakakuserra, obu okaba noobafubira, bakakwesengereza.

¹⁷Ai MUKAMA, nk'omukazi anyakwina enda arukusaalirwa naayamuza habw'obusaasi, akasumi ke obu kaba kali haihi kuhika, naitwe nukwo twabaire tuti omumaiso gawe;

¹⁸Tukatwara enda, twarumwa, baitu eki twazaire nikisisana nk'orwoya. Titwina eki twajunire ensi, busaho nzaarwa z'ensi ezaayeyongiire kuzaarwa.

¹⁹Abafu balihumbuuka, emitumbi yabo erigarukwamu obwomeezi. Muzine habw'omuhimbo! Nk'orume orurukwangasana oku rufukyafukya itaka, MUKAMA na uwe nukwo aligarurra ati obwomeezi, abaliba bafiire ira.

²⁰Murugeyo abantu bange, mutaahe omu bisiika byanyu, mwekingiremu; mwekingiremu akacu kake, okuhika ekiniga obu kirakahwaho.

²¹Habwokuba, MUKAMA ngugwo naaruga omu kikaali kye, naija kufubira abaikara omunsi habw'ebibi ebi baakozire, ensi niija kwoleka esagama eyaseesirweho kandi terigaruka kuswekerra abafu.