Read Runyoro - rutooro Is 27 Bible Online

Is 27 - Runyoro - rutooro bible

Is 27

¹Ha kiro eki, MUKAMA alikwata ekitara kye ekirukulemeera ekikooto kandi eky'amaani, afubire Endyoka, enjoka enyakwiruka, Endyoka enjoka enyakwezinga, kandi aite ekijoka eki ekikooto ekinyakwikara omu nyanja.

²Ha kiro eki, omuti omuzabbibbu ogwina okusemererwa, zina oti!

³“Nyowe MUKAMA, ninyowe mulinzi wagwo; nyikara ningwitirra. Ngulinda nyamusana n'ekiro nukwo haleme kubaho agukoraho akabi.

⁴Tinkyaina kiniga, Haa, kakuba naboine amahwa n'amakerre, naakubirwanisize. Naakubiseesiire, naakubyokiize hamu byona mbimaraho.

⁵Baitu abanyanzigwa b'abantu bange obu baraba nibenda mbajune, baije tugarukanganemu. Ego, baije tugarukanganemu.”

⁶Omu biro eby'omumaiso, Yakobbo alimera, Isirairi alikununuka eminono ayakye, ensi yoona aligiijuza ebijuma.

⁷MUKAMA akabatema nkooku yatemere abo abaabatemere. Rundi bakaitwa nk'abaabaisire oku baisirwe

⁸MUKAMA akafubira abantu be naabazahya. Akabatwara hara, yabatwaza omuyaga ogwa Burugaizooba.

⁹Eki nikyo kiriganyiza Yakobbo omusango gwe; eki nikyo kiriba kijuma kyonyini eky'okwihaho ebibi bye: amabaale goona agamatambiro obu alimara kugakora nk'ebicweka by'inoni erinyakucubaceberwe. Aserimu n'amatambiro ag'okucumikirraho obubbani, tibirisigara byemeriire.

¹⁰Habwokuba, orubuga ruli orw'amaani, tirurumu bantu, ekiikaro ekinyakuraarwamu bakakirugamu hati nikisisana nk'irungu; nuho enyana zirukuliira, nuho izaagira, nuho iriira amataagi.

¹¹Amataagi gaayo obugalyoma gakakoonoka abakazi baije bagookye. Habwokuba, eri niryo ihanga eritaina kwetegereza; habweki, ogu ayahangire abantu abo, talibaganyira, ogu ayabakozire, talibagirra mbabazi.

¹²Inywe abantu ba Isirairi, hakiro eki, MUKAMA alisorooza abantu be omu omu, okuruga hakisaaru Efuraate okugarukira ha mutaano gwa Misiri, nk'okuhuura oku kusoroora engano kukagiiha omumusunga.

¹³Ha kiro eki, haligamba engwara enkooto, abantu abaabuliire omunsi y'Asiriya, n'abo abaabingirwe omunsi ya Misiri, baliija baramye MUKAMA ha rusozi runu orurukwera orwa Yerusaalemu.